قديم 07-13-2013, 11:25 PM   #16
-||[عضو فعال]||-
 
تاريخ التسجيل: Jul 2013
العمر: 21
المشاركات: 56
معدل تقييم المستوى: 5
نونا شهاب is on a distinguished road
افتراضي


(البارت التاسع )
فوق السرير
نايمة في غرفتها وتفكررر بعمق ...
ربا تمسك الجوال وتدقو في الجداروتتأفف:يالله بالله شوفي اتخررب ذا مررة حساس
تالا مهي معاها
ربا طالعت في تالا:هييي هيييي انت هييي اهررجك انا
تالا طالعت فيها :نعم؟ ايش تبي؟
ربا:لا سلامتك بس خارجه مشوار تجي معايا؟
تالا:فين رايحه طيب؟
ربا مفجوعه:لا والله منتي صاحيه شوفي الساعه بالله تعرفي فين انا رايحه
تالا :ليه كم الساعه
ربا:4 العصر
تالا مسكت الجوال بطفش :اوووف 2 ونص الليل
ربا:ايوا طبعا رايحه ديسكو اصلا ها تجي؟ (حطت يدها على انفها وبعدها على جبهتها حركتها المعتاده ):الحمد الله والشكر
اقلك جوااالي اتخرب حسبي الله على المخ المصدي
اتوجهت لسرير تالا وجلست عليه:تاالا
تالا:اممم؟
ربا:انت اشبك ذي اليومين زي الهبل صايرة اهرجك في شي وتقوليلي شي ثاني ومنتي داريه عن الدنيا
تالا ارتبكت:لا ايش بالله اشبي بس ساعات اسرح شويه
ربا ابتسمت :ايوووا وصلنا خير تفكري في ميين يابنت ؟
تالا :لا بالله يعني حفكر في مين اكيد في حياتي اليوميه وفي امي وابويا
ربا:وانا غبيه اصدقك ؟؟
تالا قلبت للجهه الثانيه واعطت ربا ظهرها :ربا قومي سكي النور بالله ابا اناام
ربا :تصرفيني انت ؟؟
تالا:ما اصرفك قومي سكي النور
ربا :طيب بسكوو بس والا ما اعرف في ايش تفكري قلك في امي على بالها بزره قدامها
قامت وسكت النور
ورجعت تدق جوالها بالجدار
بعد ثواني ...
تالا :رباااا خلاص انت ايش تصرقعي ابااا انام
ربا :نامي نامي وفكري في امك اصلح جوالي يعني ايش شايفتني اسوي ؟
تالا تتأفف :هبله انت ؟احد يصلح جوالو يكسرروو كذا ؟
ربا :انت ايش فهمك خليك في تفكيرك احسلك (اتوجهت للسرير )
ربا منسدحه :تالا تخيلي بكرة امي الفجر رايحه مكه
تالا قلببببها يدق بسرعه:احللللفي ؟لليييش؟
ربا:خير اششبك مفجوعه كني قلت لندن مكه مكه تراها حسبي الله مو منك من تفكيرك
تالا تتأفف:ذلليييتيني بذا التفكير المهم ماقلتي ليش رايحه ؟
ربا:ابويا حيجي من الامارات لين مكه وقلها حيجلس ثلاث ايام وهيا قدها تبا تسوي عمره فحيوديها وليد بعد الفجر ويرجع
تالا:اهااااااا (وسرررحت)
بعد ثواني ..
ربا :تاااالا
تالا تفكر وماسمعتها
ربا:اوهووو ذي شكلها نامت اقول خليني انام احسن
تالا تفكر أيش حيصير ذي الثلاث الاياااام بدون ام وليد في البيت ...ونامت

في الصباااح
دخل الشركه بسرعه قبل مايجي أي احد فيها
طلع الدور الاخير اتوجه لمكتب السكرتير فتح الدرج بالمفتاح واخذ مجموعه اوراق
وبدا يقلب بسرعه ورقه ورا الثانيه ... لقيها (ابتسم بخبث )
ابو حسين :انا اوريك اجل اخلاقي مافي ها ؟
والله ابويا غلطان مسكك الشركه لكن حنشوف مين حيمسكها ذحين
رجع الاوراق وقفل الدرج واتوجه لمكتبو
ابو حسين مسك الجوال ..
احمد بعد فتره رد وصوتو نوم:الو
ابو حسين :صح النووم
احمد :....
ابو حسين :اسمعني اليوم تجيني ضروري اباك في موضوع
احمد :ليش ايش في ؟
ابو حسين :يعني لو ينفع اقلك بالجوال ليشح طلبك تجي ؟
احمد :طيب بعد الدوام ان شاءالله حمر عليك
ابو حسين :في البيت طبعااا... ولا اقل كانا ححددلك المكان بعدين
احمد:طيب
ابو حسين يالله كمل نووومك اقول سلااام (قفل)
احمد قفل ...يطالع في ساعه الجوال بعين مقفله والثانيه مفتوحه :يالله اشبو متصل ذا ذحين استغفر الله الله يستر بس مايجي من وراه الا البلاوي
قام من السرير ونزل ببجامتو من الدرج ينادي :سيتييي ... سيييتي وينك
محد رد
نزل المطبخ مالقى احد استغرب
دور في الصاله مافي
اتوجه لغرفتها بسررعه فتح الباب لقى شنطتها واغراضها موجوده اتطمن
اتوجه للحديقه يطالع يمين يسار محد
احمد باستغراب :وين راحت ذي ...سيييتييي ياسيييتي
خرجت من غرفه السواق بارتببببباك :نعم بابا
احمد مستغرب :وينك ساعه انادي
سيتي موطيه راسيه :بابا انا ما اسمع انت
احمد:ليش كنتي عند راج ؟
سيتي :بابا انا روح قول لراج قوم عشان في فطور
احمد :اهااا ... طيب روحي سويلي فطور
سيتي :حاضر بابا بس قهوة خلص بابا
احمد:وليه راج ماجاب شي؟
سيتي :ما اعرف بابا
دخلت جوه بسررعه
احمد مستغرب من حركاتها مهي طبيعيه
احمد اتوجه لغرفه راج ودق الباب محد رد
احمد يتأفف :ذحين اشبو ذا
دق بقووه
خرج راج مبهذله ملابسو ودوبو صاحي :نعم بابا
احمد يطالع فيه مستغرب :اشبك ساعه ليا اصحيك
راج :مافي اسمع بابا
احمد :طيب اشبك ماجبت قهوة ؟
راج :مافي معلوم انا سيتي مايقول بابا
احمد طفش:ذحين انتو اشبكم اليوم دوبها تقول انها قالتلك
راج ارتبك :ايوا ايوا بابا انا اتذكر ذحين هوا في يقول بس انا انسى
احمد :طيب روح جيبها يالله
راج:طيب بابا

فتح عيونو على صوت القربعه
مراد وصوتو نوم :بسم الله اشيك صاحيه
بدور دارت عليه :صباح الخير حبيبي
مراد :صباح النور
بدور:يالله قوم ياهو اخر يوم ابا انزل البحر من بدري
مراد يمرر يدو على عينو ومبتسم :قولي كذا من البدايه مو لله القومه من بدري
بدور :قوم يالله ترا الفطور جاهز
مراد :كماان ماشاءالله
بدور:ايوا يالله بستغل اليوم ان شاءالله
مراد :الله يعينني
بدور :مررراد قوم اتحررك يالله
مراد يقوم من السرير :طيب اهوو قمت عمتي
بدور تضحك وتحرك راسها بنفي:لاززم الاذيه من الصباح
دخل الحمام ...
جوالو يدق
بدور استغربت مين حيدق من الصباح
اخذت الجوال رقم غريب يدق لين فصل بدور سابت الجوال
وبعد ثواني وصلت رساله
بدور استغربت ورجعت اخذتو .. نفس الرقم
فتحت الرساله
(صباح الخير زادني ولد واليوم العقيقه ان شاء الله وتشرفني بحضورك
علي ...)
بدور بلعت ريقها شافت الاسم (علي اتزوج العام وهذي السنه عندو ولد )
بدور قلبها يوجعها :الله يباركلهم
حطت الجوال والحماس كلو راح
خرج من الحمام
مراد مبتسم :هاا ياقلبي الفطور جاهز ؟
بدور جالسه فوق السرير تفكر ومهمومة :لا ذحين حقوم اجهزو
خرجت بره الغرفه
مراد لبس واتجهز واتعطر والابتسامه مافارقتو مسك جوالو ويقلب فيه انتبه للاتصال
استغرب من الرقم واتصل
علي :هلااا والله
مراد باستغراب :هلافيك ...علللي؟؟؟
علي :ايوااا اشبك
مراد :لا بس الرقم غريب
علي:طيب ايوا غيرت رقمي بس ارسلتلك رساله ايش ماشفتها ؟
مراد استغرب :لاايش ماشفتها
علي:طيب ياسيدي بس ارسلتلك انو زادني ولد قبل كم يوم واليوم العقيقه عندي ان شاء الله بس استعجلت عليها عشان راجع الطايف شغل وكذا
مراد سرح :اهاا
علي:اقللك مراد اليوم اشبك انت منت طبيعي
مراد انتبه :مبروك مبروك الله يقر عينكم فيه ان شاءالله ويخليه لك يا ابو حسن
علي يضحك :الله يبارك فييك يارب وعقبال مانشوف ولدك ان شاءالله
مراد اختفت ابتسامتو :ان شاءالله يارب
علي :طيب يالله نشوفك اليوم
مراد :ان شاءالله
علي :مع السلامه
مراد :مع السلامه
قفل وسرح لثواني وفتح الرساله وعرف انو بدور فتحتها
اتصنع ابتسامه وخرج
بدور تحط الفطور على الطاوله ومسرحه
مراد اتوجهلها :لالا ايش الحركات هذي كل اللي احبو مسويتو ماشاءالله
بدور ابتسمت مجامله :اكييد انت الغاللي
جلسو على الطاوله
مراد بدأ ياكل
بدور مازالت على حالها في السرحان والتفكير
مراد :بدوور اشبك ماتاكلي؟
بدور انتبهت :الا اهو يالله بسم الله
مراد :بدورر
بدور :اشبي ؟ مابا شي بس كنت بقلك انو علي ارسل رساله انو اليوم الحقيقه حق ولدو ماشاءالله و
مراد قاطعها:بدور اشبك
بدور حطت الملعقه ووطت راسها وعيونها بدات تتملى دموع
مراد باستغراب:بدور؟
بدور بدات دموعها تنزل :مراد ابا طفل
مراد انفجع :ان شاءالله باذن الله حيجونا عيال ونربيهم ونكبرهم و
بدور قاطعتو :مراد يمكن انا ما اجيب اطفال
مراد برده فعل سريعه :بدور حبيبي لاتقولي كذا هذا من ربنا وبعدين ايش دراك
ترا احنا ماصارلنا ميه سنه كلها خمسه سنين ولسا السنين قدامنا
بدور تشهق :مراد انا عارفه انك انت تبا بس جالس تهديني خلاص روح اتزوج وجيب عبدالله اللي تتمناه عادي ترا
مراد يبا يتكلم
بدور رفعت راسها وكملت :مرااد لاتقلي انت ماتبا انا عارفه انك تبا واحنا الاثنين نبا بس
مراد رفع صوتو :بدووور خلاص
بدور سكتت
مراد اخذ نفس :بدور حبيبي هذي السيرة خلاص قفليها وحكايه اتزوج ما اتزوج انسيها بدور انا لك وانت ليا هذا اللي انا ابغاه واذا ربي ما اكرمنا في الدنيا ابا عبدالله في الجنه فاهمتني ؟
بدور موطيه راسها ودموعها تنزل
مراد قام وحضنها :ممكن تهدي خلاص ؟
وبعدين فين اليوم اللي بتستغليه شوفي الساعه 8 وانت لسا ما اتحركتي ولافطرتي حتى خليك انا حجلس وانت اجلسي وفي الاخير راجعين البيت
بدور مسحت دموعها وقامت :خلاص يالله انا حتجهز
مراد:طيب والفطور ؟
بدور :كلو لوحدك مابا شي جبلي شي من برا
مراد :قولي كذا من البدايه جالسه تبكي ودلع بنات ذا كلو عشان فطور من برا
بدور تضحك ودخلت غرفتها

فتح الباب ودخل البيت
اتوجه للمطبخ وشرب مويه وبعدها راح على غرفتهم
اتحمحم ويدق الباب :ربااا ربااا يالله جامعه قومي
تالا فتحت عيونها وعلى بالها ام وليد كالعاده
قامت من السرير وتتثاوب وشعرها مفتوح ومبهذل
فتحت الباب وعيونها كلها نوم :ايوا خالت (ماكملت كلامها )فتحت عيونها من الفجعه وقفلت الباب في وجهو بالقوه
وليد انفحع من القفله وبعدها استوعب وابتسم :ماشاءالله من بدايتها كذا
وليد مروق ويبا يطقطق عليها
رجع دق الباب
تالا متكيه على الباب ومتفشللله :نعم؟
وليد:ربا قامت ؟
تالا:ذحين حصحيها
وليد :عادي انا ادخل اصحيها احسن
تالا انفجعت:نعمممم؟
وليد يضحك :لاا يعني اقصد اساعدك بس تعرفي ربا يبالها مدافع عشان تقوم
تالا ضحكت :لا شكرا مابا مساعده
وليد:طيب اقلك
تالا:اممم؟
وليد :انا جيعان ومافطرت روحي سويلي فطور
تالا :هااااا؟
وليد:اشبك ؟ اقلك ابا فطور لاتقوليلي ربا ذي مساجين ماياكلو اكلها
تالا تضحك :طيب دقايق بس اصحي ربا وان شاءالله خير
وليد :لاتحطي سكر يكفي حلاوتك وانت تسويه
تالا مفجوعه على الاخر :انت هيييييييي
وليد يضحك :اقلك ربا ربا صحيها يالله
اتوجه لغرفتو وهوا مبتسم ومتوعد عليها ذي اليومين
تالا مازالت عند الباب وقلبها يدق فيها ضحك واحرااج
اتوجهت لربا :ربااا ربااا قومي يالله جامعه
ربا :......
تالا :يوووه ذي ذحين ايش يصحيها
تالا تضرب يدها على خفيف :ربببا هيي قومي يالله (انتبهت لحراره يدها ورجفتها )
تالا مستغربه مسكت راسها لقتو حااااااااار
تالا بخووف جلست فوق جنبها :ربا رباااا اشبك ؟ اشبك حارة كذا ربا
ربا فتحت عيونها بتعب :سكوو المكيف بررردانه
تالا:مكيف ايه مسكر المكيف وانت متغطيه كمان اشبك مسخنه؟
ربا بتعب وبصعوبه تتنفس :تااالا بردانه الله يخليك جيبي شي غطيني والله بموت برد
تالا قامت بسرعه وغطتها تمام وجلست عند راسها :ربا حبيبي تبيني اسويلك شي؟
ربا بتعب :ما اصدق انا حبيبتك
تالا :ياربي منك حتى وانت تعبانه تستهبلي طيب اصبري بسويلك شي واجي
ربا مهي قادرة تتحرك :تالا لاتبعدي والله تعبانه مررة نادي أي احد
تالا متلخبطه :انادي مين خالتي مهي في
ربا:نادي وليد بسرعه
تالا اترددت بس مهي لاقيه غيرو مررة ربا شكلها تعبان
لبست طرحتها بسرعه واتوجهت لغرفتو
دقت الباب
وليد:ربا ادخلي من متى تستأذني
تالا دخلت
وليد عدل جلستو وابتسم :هلااا والله
تالا متلخبطه ومرتبكه :ربا تعبانه ومسخنه بالله قوم نوديها المستشفى
وليد باستغراب:اشبهااا؟
تالا: ما ادري مررة حارة وبردانه
وليد قام بسرعه وراح للغرفه وتالا وراه
دخل الغرفه وجلس على سريرها :ربا اشبك ؟
ربا صوتها تعبان ورايح :تعبانه مرة
وليد:طيب ايش حاسه ؟
ربا:بردانه مررة
وليد :تالا روحي جيبي عبايتها حنوديها المستشفى
تالا راحت بسرعه ولبستها العبايه
وليد اخذ مفتاحو واستناهم في السيارة
ربا متكيه على تالا وتمشي بالقوه
وصلت السيارة
قام وليد ويبا يبعد ربا عن تالا مسك يد تالا بالغلط
تنحو اثنينتهم
ربا بتعبت واقفه عند باب السيارة :هيي يالله بجلس اشبكم ؟
وليد انتبه وساعدها تدخل
دخلو السيارة
تالا قلبها يدق على مسكه وليد وخوف على تاالا اتلخبطت احاسيسها
ربا بتعبب :هي انت اشبك تمشي بشويش يالله بموت
وليد انتبه :استغفر الله احد يقول ذا الكلام
زاد السرعه
وبعد دقايق وصلو المستشفى
تالا جالسه في السيارة ما اتحركت لين وليد نزل ربا معاه نزلت بعدهم
بعد الاجراءات ....
جالسين انتظار
ربا نايمه في حضن تالا ووجهها احمر
وليد وتالا عيونهم تجي على بعض ويبعدوها على طول
النيرس :ربا اسامه ...
وليد :يالله اهو جا اسمك قومي
دخلو عند الدكتور



في مستشفى اخر
الدكتور خراج من العنايه
رائد عيونو مفقعه وحالتو حاله لاا اكل ولانوم
ريم تغفى كل شويه وتقوم
رائد:ها دكتور كيفها اليوم
الدكتور:والله لسا على حالها صراحه لازم تستعجل على سفرها
رائد :ايوا اليوم ان شاءالله احاول اخلص اوراقها
الدكتور :طيب استأذن انا ...ومشي
رائد يطالع في الشباك من برا (حالها نفس امس وكل اللي يدور في راسو طيحتها )
ريم راسها دق في الكرسي وقامت بفجعه :تالين
رائد دار عليها
ريم قامت واتوجهت للشباك :اببعد من قدامي
رائد بعد وجلس على الكرسي
ريم :ياقلبي ياتالين
رائد مرتبك:ريم اوراقها وين مررة مافي وقت
ريم طالعت فيه بنص عين :مسوي انك مهتم ؟
رائد اتأفف:يااربييييييي اقل كانا اتكلم من جد
ريم :وين الدكتور ؟
رائد :دوبو كشف عليها وقال نفس كلامي لازم نستعجل على سفرها
ريم: انا ابا اكلم الدكتور مابا كلاااامك
رائد اشرلها على مكتبو :هنااك روحي حتلاقيه
ريم اتوجهت بسرعه ودقت الباب
الدكتور:اتفضل
ريم دخلت
الدكتور ابتسم :اهلا اتفضلي
ريم جلست :دكتور قلي كيف تالين ؟
الدكتور:والله يا اختي البنت حالتها سيئ هوانا كلمت اخوها وقلتلو لازم تستعجل على سفرها
ريم :طيب فين حنسفرها ؟
الدكتور:والله انا اعرف دكاترة مختصين وومتازين في المانيا وحعطيكم ارقام تواصل تفيدكم واانا بنفسي حكلم دكتور اعرفو وابلغو عن حالتها
ريم:طيب مررة شكرا انا استأذن
خرجت ورجعت جلست تدق على عبدالحميد مايرد
ريم تتأفف:ياربيي ذا اشبوو مايرد
رائد :طيب اوديك عادي اهم شي تجيبي الاوراق
ريم ماردت وكملت اتصالات
بعد دقيقه
رائد :يعني حتجلسي لين متى كذا انت شايفه البنت كيف حالتها
ريم :لا والله دوبك تحس ؟
رائد :اقللللك قومي انا حوديك يالله امشي
ريم ماعندها الا ذا الحل قامت :امشي قدامي يالله
رائد مايحب احد يعاملو كذا بس اللي سواه مو شويه سكت منها
خرج من المستشفى
ودخل السيارة
ريم جلست ورا وتطالع مفجوعه دم تالين على الكرسي مليان
اتملت عيونها دموع ومسحتها بسرعه
رائد:فين بيتهم
ريم:لا والله ؟. يعني لما خطفتها جبتها من عندي مثلا؟
رائد :خطفتها ايشش؟ ايش الكلمه ذي وبعدين انا كنت ماشي ورا السواق وما انتبهت للطريق
ريم :حي .... شارع ...
رائد اتحرك بسرررعه
ريم تهز برجولها ومهي عارفه ايش تقول لمحمد
بعد دقايق وصلت البيت
رائد:يالله انا استناك
ريم دخلت ودقت الجرس بلعت ريقها من الخوف
فتحت الشغاله :اهلين مدام ريم
ريم:محمد هنا؟
الشغاله:لا مدام بابا يروح جامعه
ريم دخلت واتوجهت لغرفه ام ريم
دقت الباب
ام محمد تصلي وهي جالسه ودموع في عينها
ريم دخلت وخايفه تدمع في أي لحظه
ام محمد :السلام عليكم ورحمه الله .. السلام عليكم ورحمه الله
ريم: تقبل الله خالتي
ام محمد :منا ومنكم يابنتي
ريم :كيفك ياخاله ان شاءالله احسن ؟
ام محمد بتعب:الحمدالله
ريم:طيب انا بس جايه اتطمن عليك واخذ شي من اغراض تالين عشان نبا البيانات بس واطمنك ان شاء الله انو قريب حنلاقيها وتشوفيها
ام محمد رفعت يدها تدعي:ياررب يابنتي ااااه والله قلبي يوجعني وتعبانه ابا بنتي
ريم ماسكه نفسها سلمت على راسها :ان شاء الله خالتي انت ادعيلها تكون بخير وترجعلنا يارب
ام محمد :ان شاء الله
ريم قامت واتوجهت لغرفه تالين
فتحت الباب ودموعها نزلت على طول البيت هادي ومتعودة صوت تالين يستقبلها كل مرة
غرفتها مظلمه بدونها والبيت مايسوى شي
فتحت الدولاب واخذت التذاكر (هديتها سفره لالمانيا تذكرتين لها ولمحمد وريم معاهم )
دموعها تنزل :ياحبيبتي ياتالين مين كان يتوقع سفرتك حتكون لعلاج مو لتمشيه
اخذت اوراقها وجوازها وكل شي وخرجت بسرعه
رائد مستني بفارغ الصبررر
دخلت السيارة :امسك هذي اوراقها وهذي تذاكر لالمانيا جاهزة بس حنقدم الحجز
رائد مستغرب:كيف حجزتي ولا ايش ذي التذاكر؟
ريم:مو شغلك الاوراق واديتك اياها خلاص؟
رائد يحرك راسو بنفي :استغفر الله بس
ريم اتصلت
محمد:الوو
ريم:هلا محمد كيفك؟
رائد منغاض مررة حتى في ذي الحاله حبو لريم فوق أي ظرف
محمد:الحمدالله تمام كيفك انت؟:
ريم:انا تمام الحمد الله ...اممم اسمع اباك اليوم ضروري في موضوع
محمد مستغرب:ايش ؟
ريم:خلاص ان شاءالله حتعرف بس قلي فين نتقابل؟
محمد:طيب اجيك الببيت ولاتجيني ولامطعم ولا ايه عادي انا
ريم :انت في الجامعه صح ؟
محمد:ايوا
ريم :خلاص انا حجيك عند الكوفي المقابل
محمد:طيب استناك
ريم :يالله سلام
محمد:سلام
رائد:كيف ذحين؟
ريم :.....
رائد:اهرجك انا
ريم:نعم؟
رائد:خلاص حوديك البيت وبعدين روحي قابليه لحالك
ريم:ايوا طبعا حجيبك معايا مثلاا اكيد (لحالنا ) اتقصدت ذي الكلمه
رائد اتنرفز ومشي بسرررررعه

في الجامعه
وسط القاعه الكل موجود ومستعد
احمد :وفرنا باصات طبعا حتوديكم للمركز على طول
وحيستقبلوكم هناك
يالله اتفضلو
بدأو يتوجهو للباصات وركبو واتحركو على المركز
احمد حيكمل شغلو ويلحقهم ....

نايمه بعمق ... اتقلبت على الجهه الثانيه وفتحت عينها بشويييش
طالعت الساعه في االجدار قدامها
نطت وطاحت على الارض وتطالع في الساعه مزببوط تبا تستوعب
ماريا بفجعه:اوووووووووف 9
قامت جرررري على الحمام ... خرجت واتجهزت بسرعه ولبست عبايتها واخذت اغراضها ونزلت جرررري
ماريا :امممممي وين السواق
ام مراد دوبها صاحيه من النوم :اوووف انتي مارحتي ؟
ماريا :لا بسرعه وينو
ام مراد :دقي عليه طيب اكيد تحت
ماريا مسكت الجوال واتصلت
ماريا :الوووو وينك
السواق:انا تحت مدام
ماريا تجري نازله من الدرج :طيب شغل السيارة انا نازله
السواق شغلها بسرعه
ماريا دخلت السيارة وجلست تتنفس بصعوبه :ياااربي اكيد راحو انا ايش اللي ماخلاني اقوم يااااارب لسا يارب لسا
بعد دقايق وصلت
ماريا نزلت بسرعه ودخلت
ماريا اتوجهت للقاعه بسرعه
فتحت الباب بقوه وانفجعت :لااااااااا راحوووو
احمد من بعيد يطالع ومستغرب
ماريا تتأفف :ذحين بالله ايش اسوي وين ادورلهم مني عارفه فين المركز حتى
احمد جا من وراها :بدري؟
ماريا لفت بسرعه وبفجعه :احمد؟
اقصد دكتور احمد ؟
احمد:اشبك متأخره كلهم راحو ؟
ماريا:اسفه والله بس راحت عليا نومه
احمد :طيب انا ذحين رايح بس بخلص شغلي اول بعدين نروح
ماريا ارتاااحت بس في نفس الوقت استوعبت انها رايحه معاااه !!
ماريا جلست على الكرسي وسط القاعه تستناه ومتنحححه
احمد يقلب في الاوراق ويشيك عليها ...
بعد ربع ساعه ...
احمد مازال يشتغل ...(طالع في ماريا وابتسم):هذي ضريبه تأخيرك لازم الواحد يتعلم الالتزام بالمواعيد
ماريا نفسها تعطيه كف طفشت وهي تستنى :اممم انا ملتزمة بمواعيدي بس اليوم شي اضطراري
احمد:والله صراحه تفاعلك معايا يأكد انك نبيهه فاستمري على اجتهادك
ماريا:اممم شكرا
احمد يلم الاوراق :طيب كذا احنا خلصنا اتفضلي
احمد خرج وماريا وراه قلبها يدق وخايفه كيف حتركب معاه لوحدها

احمد خرج وركب السيارة
ماريا ركبت ورا طبعا وجالسه جنب الباااااب من الخوف
حركت السيارة ...
احمد:ها كيف شغلك كلو معاك ؟
ماريا:ايوا الحمدالله جبتو كامل
احمد بابتسامه اعجاب:طيب كويس يعجبني الاهتمام
ماريا ابتسمت بخجل (في قلبها):وينك ياربا تشوفي انا ويين وايش اسمع
بعد ثواني ...
احمد يدور بين الاوراق قبل ماتفتح الاشارة
احمد بطفش:لااااااا لايكون نسيتها
ماريا مستغربه ..
احمد :معليش يا ايش قلتيلي اسمك؟
ماريا:ماريا
احمد :العفو ياماريا بس مضطر اروح البيت العقد حقي مع الشركة مو موجود دقايق بس ماحنتأخر ان شاءالله
غيروجهتو للبيت
ماريا مهي مستوعبه :ياهو ايش قاعد يصير ايش اللي اروح لين بيتو
بعد دقايق وصل البيت
ماريا تطالع في فلتو مرررة مرتبه وحلوة
احمد نازل من السيارة:دقايق بس اجيب الورق
ماريا:اتفضل
احمد دخل البيت وماقفل الباب من الاستعجال
ماريا مستنيه وتفكر ...
مر شاب جهه ماريا وابتسم
ماريا قلبت وجهها للجهه الثانيه
مرو مجموعه شباب
كل واحد وقف عند شباك
واحد من الشباب :اعطينا وجه طيب
ماريا تتأفف وماتطالع فيهم
شاب ثاني عارض البن حقو
ماريا بطفش :يالله ذحين فايقتلهم انا
حست الشباب مهم راضيين يروحو
اترددت وبعد تفكير فتحت الباب
الشباب رجعو على ورا
ماريا مشيت بسرعه وبخوف
دخلت الفله وقفلت الباب
الشباب مشيو
تطالع في الحديقه ومرررة خايفه
جلست على كراسي الفله
والهدوء مملي المكان ماتسمع حس لاي احد
جالسه وتطالع يمين ويسار وتستكشف الاماكن بعيونها
في ناحيه ثانيه من الحديقه
بعد الترجمه طبعا :حبيبي دقيقه انا ذحين جايه
راج يضحك :خذي راحتك البيت بيتنا
سيتي ولبسها مايبشر بخير ابدا تضحك :طيب دقايق ذحين جايتك
راج يمشي وراها :جاي معاك ما اقدر استنى
ماريا موطيه راسها وتحرك رجولها خايفه ومستحيه واحمد اتأخر
مسرررحه (قاطع سرحانها )مرورهم قدامها داخلين الفله
ماريا تسمع اصوات وناس يتكلمو بس مهي فاهمه كلمه وضحكهم وصل لين عندها
مرو من قدامها وشكلهم سيئ جدا
ماريا تطالع وفاتحه عينها على الاخير وصررررخت من الفجعه والخوف مهي مصدقه اللي تشوفو قدامها حطت يدها على فمها ويدها ترجف
احمد نازل من الدرج سمع صوت صراخ نزل يجري مو داري مين ممكن يصرخ
راج وسيتي اتصلبو مكانهم يطالعو فيها مين هذي وايش جابها
احمد فتح الباب ونزل الحديقه
وراج وسيتي معطينو ظهرهم ويطالعو في ماريا
وماريا واقفه وترجف وعيونها فيها دموع من الخوف والمنظر اللي قدامها
احمد وقف مفجوع مو فاهم ايش صاير
ماريا شافت احمد
صرخت وجريت :احمممممممد
احمد متصلب مكانو
راج وسيتي دارو على احمد وعيونهم وسعت والارتباك واضح عليهم
ماريا جات ورا احمد
ودموعها نزلت غمضت عيونها وجات ورا ظهرو بمسافه شويه :ايش ذاااا يا احمد
احمد راح جهتهم وقف قبال راج وسيتي
ومو قادر يطالع فيهم
احمد مايشوف شي بركان يفور في داخلو كيف يأمنهم على بيتو وعايشين معاه
اعطى راج كف جااااااااااامد
راج جلس على الارض تحت احمد:بابا انا
سيتي تبكي ودخلت غرفه راج تاخذلها شي يغطي الممكن تغطيته
احمد بعصبيه تامه:ايش هذا يا.... ايش اللي تسويه انت انا خليتك هنااا في بيتي
تسوي كذا انت وهذي ال.....
راج يبكي :بابا الله يخليك انا في بابا وماما في هند تعببان
احمد :لااا والله بابا وماما انت مافكرت فيهم لما سويت كذا ؟؟
والله ما اخليك لحظه هناا امشي قدامي يا....
ماريا من بعيد تطالع وترجف خوف انحطت في موقف عمرها ماتتخيلو الشي اللي شافتو كثير عليها
راج يترجاه :بااابا لا مايبا يسافر انا بابا انا مسكين مافي فلوس بابا خلاص انا مافي سوي شي خلاص
احمد :قوووووووووووم من قدااامي ولا الله جثتك على يدي
راج مو فاهم شي بس عارف انو تهديد
قام واتوجه لغرفتو لم اشياؤ
وسيتي خرجت من غرفتو
احمد بدون مايطالع فيها :وانت يا.... لمي اغراضك بسرعه قله حيا وناس مهي متربيه حسبي الله ونعم الوكيل انا كيف أمنكم على بيتي
دخلت وهي تبكي على غرفتها ...
احمد اخذ نفس ودار على ماريا
ماريا تمسح دموعها ومتكتفه بخوف
احمد جا قبالها :هدي ياماريا خلاص ذحين حسفرهم انا مني عارف كيف خليت ناس زي كذا في بيتي
ماريا تمسح دموعها وساكته وتشهق بشويش
احمد مو عارف كيف يهديها :استغفر الله العلي العظيم خلاص يابنت الناس خيره جيتك معايا ولاكان جلست على عمايا
ماريا وصوتها بكي:انت كيف عايش مع ذولا
احمد اتنهد :انا عايش لوحدي الحمد الله بس
ماريا تطالع فيه وبعدها وطت راسها :ايش حنسوي ذحين
احمد :ماريا انا اسف بس لازم اشوف حجز واسفرهم واذا مافي يحتجزوهم عندهم او أي شي المهم ابا اتخلص من ....ذولا
ماريا :......
خرج راج وهوا موطي راسو وبعد دقايق خرجت سيتي
احمد كان بيتوجه للسيارة
ماريا :احمد ماحتفتش شنطهم ؟
احمد ابتسم شويه :الله يذكرك الشهادة والله نسوني كل شي ذولا
احمد اتوجه لشنطهم
سيبو اغراضكم على الارض انت وهيا
سابو اغراضهم
احمد فتح شنطه راج ويدور وينزل الاشياء مالقي شي
فتح شنطه سيتي ونزل اللي فيها لقى تيشيرتو
احمد يطالع فيها باستنكار :ايييش ذاااااا؟
سيتي ارتبكت على الاخيرر :مافي معلوم بابا هذي كيف يجي هنا
احمد :لاوالله ناويه اتسحريني انت اعوووذ بالله منكم انا ايش اخذت منكم غير الهم والشر الله يفكني منكم يارب
مشيو قدامو واتوجهو للسيارة
ماريا مشيت ورا احمد
راج ركب جنب احمد وماريا وسيتي ورا
ماريا ورا احمد وسيتي ورا راج
ماريا برضو ملصقه في الباب بس ذي المرة من خوفها منهم ومن اللي شافتو
مسك الجوال واتصل
احمد:الو السلام عليكم
الرجال:وعليكم السلام
احمد:ابا اقرب وقت لحجز الهند
الرجال :في بكرة الصباح
احمد :طيب كويس اسمع احجزلي شخصين
الرجال:طيب انت يا احمد ولا ؟
احمد:لا ياشيخ الخدام والسواق ابا اسفرهم
الرجال :خلاص اسمع ارسلي الاشياء والاوراق وانا ححجزلك بس عشان اكمل الاوراق
احمد:خلاص مهي مشكله حرسلك اياها يالله مع السلامه
الرجال:مع السلامه
وصلهم للمكتب
ودخلو وراه
ماريا مستنيه في السيارة
احمد حطهم في المكتب عند صاحبو معرفه واحتجزهم عندو لين بكرة سفرهم
احمد رجع ركب السيارة وحركها
احمد يطالع في المرايا :خلاص الحمد الله اتفكينا من ذي السيرة
ماريا :اممم
احمد :طيب انا عارف انو نفسيتك تعبت من اللي شفتيه وانا كمان صراحه ما اعتقد حروح المركز اليوم
ماريا :ما ادري بس من جد ماحقدر اشتغل شي
احمد :طيب مهي مشكله بس اديني وصف بيتكم واوصلك وبكرة نبدأ ان شاءالله
ماريا :حاضر
اعطتو وصف البيت
في الطريق
ماريا متردده تسال ولا لا :دكتور احمد ممكن اسال سؤال
احمد :اتفضلي
ماريا :معليه يعني بس انت عايش وحدك؟
احمد :ايوا عايش لوحدي
ماريا باستغراب :اهاا
احمد :والله امي متوفيه وابويا متزوج وعايش مع زوجتو في بيت لوحدهم وانا عايش لحالي مرتاح بدون مشاكل
ماريا :اهااا الله يعينك يارب
احمد :امين
بعد دقايق وصلو البيت
ماريا تأشر :خلاص هنا هوا
احمد وقف السيارة
ماريا خارجه :يعطيك العافيه دكتور
احمد ابتسم :تقدري تناديني احمد بما اننا برا الجامعه
ماريا ابتسمت ووطت راسها :ان شاءالله
دخلت البيت
احمد يطالع فيها ومبتسم:يسعدك ويسعد اللي رباك ماشاءالله
وحرك السيارة راجع بيتو ....
(انتهى البارت التاسع )


نونا شهاب غير متواجد حالياً   رد مع اقتباس
قديم 09-11-2013, 09:13 PM   #20
-||[عضو فعال]||-
 
تاريخ التسجيل: Jul 2013
العمر: 21
المشاركات: 56
معدل تقييم المستوى: 5
نونا شهاب is on a distinguished road
افتراضي


(البارت العاشر)
صوت البحر والمكان فيه ناس بس مو مرة يتمشو بروقان وماسكين يد بعض
بدور :الله يجنن البحر مررة ماينمل منو
مراد :ايوا والله شي جمييل من جد
جوال مراد دق
مراد :الو
ام مراد:هلا بالغاليه
بدور طالعت فيه وابتسمت :خالتي؟
مراد اشرلها براسو ايوا
ام مراد:هلافيك ياولدي كيفك ؟
مراد:تمام الحمدالله انت كيفك؟
ام مراد :الحمدالله بخير
مراد:كيف ابويا وماريا
ام مراد :كلهم الحمدالله طيبين
في هذي الاثناء
بدور تطالع في البحر وفي المكان ومستمتعه
جات من بعيد تجررري والابتسامه على وجهها
بدور تطالع ومهي مركزة من ذي
جات وحضنتها :مااااامااا بدووووور
بدور ابتسممت : لمى؟؟ياقلبي انت وحشتيييني
لمى :وانت كمان وحشتيني بس ليش ما اتصلتي عليا انا من اول استناك
بدور :اممم اسفه حبيبي بس انشغلت شويه
مراد قفل السماعه ويدخل جوالو في جيبو وباستغراب:ايش قالت؟؟
بدور ابتسمت وهيا تطالع في لمى :ماما بدور قالت ماما
مراد مستغرب وبصوت واطي :مين ذي اصلا
بدور :هذي بنتي صح ؟
لمى تأشر براسها ايوا
تدور عليها وتنادي من بعيد :لمـــــــــــــــــــى يالمــــــــــــى
لمى سامعه بس ماتبا ترد
مروة جات عندها معصبه :اشبك ماتسمعي مخليتيني ادورك زي الهبله لكن انا اوريك امشي معايا اقول
مراد يطالع في بدور ومو فاهم ايش في
بدور :هلا مرووة كيفك
مروة تطالع في بدور :اهلين وانا اقول اشبها لمى اختفت فجاه طلع عشانك
بدور تبتسم :يسعدها خليني اخذها معايا امشيها
مروة تطالع في مراد :ها؟طيب طيب
بدور :طيب تجي معانا ؟
مروة :لالا ايشش اجي
بدور:الله يخليك احنا من زمان لحالنا تعالي ننبسط شويه
مروة طفشانه مرة :طيب يالله
مشيت مروة وبدور ولمى ومراد وراهم
دارو على البحر وكل وحدة بدأت تتكلم عن حياتها ويتعرفو اكثر

في المستشفى
الدكتور :والله البنت مسخنه وعندها التهاب حاد لازم تنام ليله اقلها في المستشفى نتطمن عليها وترتاح
وليد :طيب يعني لازم من التنويم ؟
الدكتور:والله الافضل لصحتها ايوا
وليد :طيب مشكور ماتقصر
الدكتور:العفو ... بس اباك توقع على اوراق عشان اجراءات التنويم وكذا
وليد جالس على المكتب ويشوف الورق ويوقع
في الغرفه (على السرير)
ربا منسدحه :ااااه حلقي يعورررني
تالا واقفه قبالها :سلااامتك ماتشوفي شر
ربا :ياخي ذا الدكتور يجيب الهم جالس يبربر فوق راسي ويكلمني ماكانو حلقي يعورني وياريتو حلو حتى
تالا متعجبه :لاحول ولاقوه الا بالله انت ماتتوبي ايش دخلك في الرجال
ربا :اسمعي ياخي جيبي جوالي اقول خليني اتسلى
تالا اعطتها الجوال :امسكي
ربا مسكت الجوال :اوووف سبعه مكالمات من ماريا
تالا:ايوا اتصلت عليا بس ماسمعتها
ربا :اصبري خليني اتصل
تالا مفجوعه :دووبك تتوجعي من حلقك والله انك بكاشه ياشيخه
ربا :هذي حكاوي ماتتفوت مدامو سبعه مكالمات اكيد صاير شي
ربا تتصل
ماريا ردت على طول :الوووووووو
ربا:هلاااا بالزين
ماريا :هلافيك وي اشبو صوتك كنو رجال
ربا:حلو صح ؟
ماريا :هبله انت ؟
ربا:تعباننه منتي داريه ترا اكلمك من المستشفى ذحين
ماريا انفجعت :اشبببببببك؟؟؟
تالا سحبت الجوال من ربا :هلا ماريا
ربا تطالع في تالا بحقد :وجع يوجع بليس
ماريا :االو مين تالا ؟
تالا:ايوا اقلك ربا تعبانه مسخنه وحلقها يعورها والدكتور منعها من الكلام الكثير بس هي هبله ماتسمع
ماريا :ااهاااا طيب وحشتوني ياخي بجي عندكم اليوم
تالا :وانت اكثر طيب اذا كل شي تمام حكلمك تجي يالله سلاام
ماريا :سلااام
ربا تحاول تعلي صوتها :خيرر انت مالت عليك ايش السحبه ذي
وليد دخل :اش في ياربا صوتك لين برا اشبك تزعقي على الادميه هذا وهي واقفه معاك وسايبه جامعتها
ربا:انت ايش دخلك كلام بنات خالات
تالا موطيه راسها ومبتسمه على الدفاع :طيب حتى هوا ولد خالتي
وليد ابتسم : في الجببببببببهه
ربا مسكت جهاز الضغط ورمتو على وليد
وليد مفجوع وفيه ضحك مسكو :اشببببك انت على بالك حقنا ؟
ربا قلبت راسها :اسكت بس
وليد وتالا يضحكو
وليد :اقلك ترا ربا بتنام اليوم هنا
ربا دارت راسها عليهم بسرعه :احلللف ؟
وليد :والله من جد
تالا:طيب مين حيجلس عندها ؟
وليد :انا وياك محد غيرنا
دخلت النيرس معاها كرسي :حننقلها للدور الثاني
ربا جلست وتطالع في الكرسي :انا حجلس على ذا ؟
تالا ووليد ماسكين ضحكتهم
ربا :ترا اقدر امشي
نزلت من السرير وطاحت في الارض :الله يقلع بليس شكلو مصيري على ذا الكرسي
طلعتها على الكرسي
ربا اتربعت :حركي حركي بس
وليد:الحمد الله والشكر مجنونه
طول ما النيرس وربا يمشو وتالا ووليد تجي عينهم في بعض ويبتسمو
تالا اتعودت تشوف ابتسامتو تدخل قلبها
وليد كل مايشوفها يبتسم ويحمد ربو كل موقف يقربهم من بعض

في الكوفي
ريم تتصل :ايوا محمد اول ماتدخل على يدك اليمين
محمد داخل :ايوا ايوا شفتك (قفل الجوال)
واتوجهلها وجلس
محمد:هلا ريم
ريم :هلا محمد كيفك ؟
محمد:تمام الحمدالله انت كيفك ؟
ريم:تمام
ريم :امممم اسمع الموضوع اللي بكلمك فيه مررة مهم ويخص تالين
محمد فتح عيونو :اشبهااا تالين ؟ايش في؟
ريم :اسمع يامحمد اباك تهدي اعصابك شويه ولازم تتفهم الموضوع كويس
محمد حاول يهدي :طيب اتفضلي
ريم :انا كلفت ابويا بدور على تالين بصراحه ماقدرت اصبر والحمدالله لقيناها
محمد:وين لقيتوها ؟فينها هيا؟
ريم :محمد الله يخليك لاتنفعل اسمعني للاخير
محمد اتأفف:طيب بس والله وترتيني
ريم:شوف بابا لقاها مع عصابه خاطفينها
محمد فاتح عينو ومو مستوعب :عصااابه؟؟؟؟
ريم اتربكت مهي داريه من وين جابت ذي الكلمه :شوف يعني هيا شكلو احد متقصدها لانو نزلت من البيت بناء على طلب واحد اتصل وقلها انزلي ضروري
وهي مسكينه على نياتها نزلت
واخذوها معاهم مين هما ذولا انا ما ادري علمي علمك
بس اللي يبشر في الموضوع هما ما اذوها وابويا ماشي معاهم بالفلوس
وطلبو مبلغ كبيبر عشان يسلمونا اياها وتبا الصراحه شكلو متقصدينها من جهتي
عشان عارفين اني صحبتها وحيدفع ابويا أي مبلغ عشان اجيبها
محمد متوتر:ريم فهميني زي الناس واتكلمي بشي منطقي تالين ذحين فينها ومين ذولا
ريم:طيب انت اسمعني وخليني اكمل كلامي
محمد ماسك اعصابو :اتكملي بسرعه ترا مني قادر اصبر
ريم:هما في البدايه حاولو يأذوها بس تالين حاولت تشرد ومالقت غير شباك تشرد منو انا مني عارفه هي كيف كانت تفكر بس ابويا قالهم يسلمونا اياها واحنا حنعالجها بس رفضو وذحين هي بتتعالج
محمد :ريم انت مخبيه شي عليا ؟
ريم :محمد اشبك منت مصدقني
محمد:ايش عصابه ومدري ايش شكلو ومين ذا اللي متقصدها
ريم :طيب يامحمد ذا هوا الواقع واللي صارلها ذحين مو هذا المهم
المهم انو مايبو احد يجيها في المستشفى انا رحت وشفتها وجبتلهم اوراقها عشان العلاج
بس احنا طلبنا انها تتعالج بره وانا اللي حسافر معاها لانو لو انت جيت حتصير مشاكل ومانعرف اذا تالين حتسلم ولا لا
محمد:لا والله اخليها تسافر مع رجال وانا هنا ما اتحرك اذا انت عادي عندك انا اختي مو عادي
ريم انفجعت :محمد انت ايش تقول ترا جالس تلخبط
محمد:وانت خليتيني اقول شي عدل عصابه وسفره لبره وعلاج وماتبيني اتدخل في الموضوع
ريم عصبت :محمد هوا ذا الموضوع اذا تبا تالين ترجع سالمه اسكت وسوي اللي اقلك عليه ولا ترا تالين ماحيصير فيها طيب لو انت اتدخلت
محمد بلع ريقو واخذ نفس :يعني ايش افهم من كلامك ؟
ريم اخذت نفس:محمد تالين انا حسافر معاها ولانو اللي متقصدينها متقصدينها عشاني انا حتحمل أي شي يصير
واحنا ماحنجلس سنه ترا كلها كم اسبوع علاج وراجعين ويسلموها ونسلمهم المبلغ وانتهينا
محمد مرر يدو على وجهو بقوه :شوفي انا ذحين مني مستوعب شي انا ماشي ووالله ياريم اذا صار فيها شي ماتلومي الا نفسك انت وابوك
امي مريضه وحالتها ماتسر العدو وذحين تقوليلي من جهتك ؟
قام معصب وخرج بره الكوفي
ريم عيونها مليانه دموع عمرو ماكلمها بذي الطريقه حتى لو تعتبرو زي اخوها بس هيا مالها ذنب وكل شي يجي فوقها ...نزلت راسها على الطاوله ودموعها تنزل
مهي عارفه شايله هم تالين وتعبها ولا محمد كيف حتفهمو ولارائد كيف تتعامل معاه

جالس فوق سريرو متمدد ويفكر في يومو( قاطع تفكيرو رنه الجوال)
احمد مسك الجوال (الله يستر):ايوا الو
ابو حسين :ايوا اسمع استناك انا في مطعم ....
احمد:طيب ايش في بالضبط اقلها قلي الخلاصه
ابو حسين :بعدين حتعرف انت تعال وبس
قفل الجوال
ابو ريم :ذحين انت قلي ايش الهرجه كيف حتدبرها معاه وايش دراك انو حيوافق
ابوحسين:ذحين انت ممكن تسكت وتخليني انا اللي اقنعو
ابوريم:ياسلام اصغر عيالك انا
ابوحسين:عبدالعزيز اهجد ذحين انت مو تبا ترفع مكانتك في الشركه هيا اسكت
ابو ريم بيشوف ايش نهايتها يتأفف كل شويه
بعد دقايق وصل احمد
ابو حسين :اهو وصل
احمد جاي باتجاههم واتأفف لما شاف ابو ريم :ماتجي من جمعاتهم الا المصايب
احمد :السلام عليكم
ابو حسين :وعليكم السلام اتفضل اجلس
احمد جلس ...
ابو حسين :اسمع يا احمد اباك تفتح مخك معايا
احمد :طيب ايش عندك؟
ابو حسين :شوف انا وعمك عندنا مشروع شركه ادوات بناء تعرف هذي اليومين سوقهم ماشي مررة
وانا وابو ريم تعرف كيف مشغولين في شركة الاستثمارات حقنا واذا سبناها ورحنا الشركه ذي حنخسر كثيرر وبعدين هذي املاكنا كلها مانقدر نفرط في شغلها
احمد :طيب؟وانا ايش المطلوب مني ؟
ابو حسين :نبا نخليك مدير عليها هيا حخليها تابعه لنا بس انو انتح ندخلك شراكه فايش رايك ياولدي صراحه مكسب لك ولنا وانا ما اقدر أمن احد على شركتي اكثر منك
احمد :طيب انا شغلي كيف اسوي فيه
ابو ريم: بلا شغل بلا يحزنون ايش هوا على دكتور في الجامعه ماتبا تصير مدير شركه انت منت شايف الفرق
احمد:بس هذا هوا تخصصي واللي انا احبو مو شركات ودوشه
ابو حسين :شوف يا احمد انت تبا تأمن مستقبلك لازم توافق انت ايش يضمنك بكرة الجامعه تجيب ناس احسن منك وانت يقولولك مانبا شفلك مكان ثاني فبدل الشرشحه
اشتغل احسن في املاكك
احمد:طيب وكم المدة اللي حشتغل فيها
ابو حسين حس انو احمد بدا يقتنع :والله شوف انا بخليك تشتغل على راحتك في البدايه وتسوي اللي تبغاه
ابو ريم:ها ايش قلت ؟
احمد :طيب انا بفكر وان شاءالله ارد خبر
ابو حسين :خذ راحتك عندك يومين وتردلي خبر
احمد :يصير خير ...انا استأذن
ابو ريم :طيب مااكلت شي
احمد:لا انا اتغديت الحمدالله من زمان مع السلامه
خرج وركب سيارتو يسوق وفكرة تجيبو وفكرة توديه مو عارف يوافق ولا لا

تلم الاغراض وتفتح الدواليب وترفع كل شي خايفه تنسى شي
مراد :يالله ياهو نص ساعه وحنمشي ابا الحق ارجع اناملي ساعه واروح العقيقه
بدور تكمل ترتيب :ايوا وانا ايش شايفني اسوي اهو قاعده ارتب
مراد :اوووف والله تعب مالي نفس اداوم بكرة
بدور ترفع بسرررعه وترمي بالاشياء وتدور يمين يسار :مرااااد مراد اسمع شفت جوالي ؟
مراد:يعني وين تلاقيه في الصاله او شي
بدور راحت تدور
وبعد دقايق رجعت :ياهوو مافي دورت في المطبخ في كل مكان مافي شي
مراد :يعني فين حيروح انت فين اخر مرة استخدمتيه ؟
بدور تحاول تتذكر :والله مني فاكرة متى انت دوشتني يالله يالله
مراد:انا ادري عنك جالستلي سنه مع الادميه فاكه هروج ودنيا
بدور:حرام عليك والله تجنن وطيبه يكفي بنتها دخلت قلبي
مراد :طيب وسبحان الله صارت صحبتك في يوم وليله
بدور:والله طيبه واخلاق وماتنعاب ليش لا
مراد :اممم طيب طيب روحي دوري لجوالك
الباب يدق
بدور باستغراب :انت طلبت اكل ؟
مراد مستغرب :اكل ايه هوا ذا وقت اكل اصلا ؟(قام من مكانو ) اصبري خليني اشوف
مراد فتح الباب
ابتسمت باحراج :بدور موجودة ؟
مراد متعجب ورافع حواجبو :امم مين اقلها ؟
مروة :اشبك مسرع نسيت انا مروة ام لمى
مراد اتذكر :اهااا ..ايوا موجودة دقيقه اناديها
مروة :لالا مافي داعي بس هيا اعطت لبنتي جوالها تلعب فيه ونسيتو عندها
بدور جات لما سمعت صوت حرمه :مين ؟
بدورابتسمت :هلااااا والله
مروة :اهللين
بدور:اتفضلي ياهلا والله نور المكان
مروة تضحك تسليك :منور بوجودك تسلمي
بدور :طيب ادخلي اشبك واقفه
مراد دخل جوه ومروة تطالع فيه وتتكلم :لالا بس هذا جوالك نسيتيه مع لمى
بدور مبتسمه :اهاا وانا ادورلو نسيت اني اديتها اياه تلعب فيه طيب مررة شكرا كنت ادورلو عشان خلاص رايحين
مروة اختفت ابتسامتها :ليييش ياهو مرة انبسطت بوجودك اتاخرو لين بكرة انا بكرة راجعه
بدور :لا واله مانقدر مراد عندو شغل وكذا
مروة :طيب خلاص رقمي معاك ورقمك معايا
بدور :اكيد مايبالها خلاص صرتي مننا وفينا
مروة :تسلمي حبيتي ..طيب يالله انا ماشيه نشوفك على خير
(يسلمو على بعض )
بدور:ان شاءالله مع السلامه بوسيلي لمى
مروة :ان شاءالله يوصل
مروة مشيت وبدور قفلت الباب
مراد يلبس :يالله ياهو انا بجهز السيارة والله مرة تعبان ويادوب الطريق كمان زحمه
بدور :طيب يالله خلاص البس ونمشي

واقفه قدام المرايه تمشط شعرها ومبتسمه .. لفت شعرها ولبست العبايه وتتصل
ماريا :الوو
السواق:ايوا مدام
ماريا :ها جهزت السيارة ؟
السواق :ايوا انا تحت مدام
ماريا :طيب يالله انا نازله
نزلت من الدرج قابلتها امها
ام مراد :سلميلي عليها وقوليلها بالسلامه ان شاءالله
ماريا :ان شاءالله يوصل بس زي ماقلتلك لاتقولي لامها ترا ماتدري مايبوها تقلق
ام مراد:طيب فهمت كم مرة تقوليلي وبعدين اسمعي بكرة ان شاء الله مراد ومرتو حيجو يتغدو عندنا
ماريا :اهاا طيب ان شاءالله يالله انا ماشيه مع السلامه
ام مراد :استودعتك الله
ركبت السيارة واتوجهت للمستشفى

حاطه يداتها ورا راسها وتتفرج تلفزيون
ربا:تالا هي متى بتجي ماريا
تالا:ذحين تقول في الطريق
ربا :اهااا
وليد دخل الغرفه :السلام عليكم
تالا تعدل طرحتها وردو سوا:وعليكم السلام
وليد جلس على الكنبه اللي جالسه تالا عليها بس كل واحد في طرف :ها كيفك ربا ؟
ربا :تمام
وليد طالع في تالا وابتسم :كيفك ؟
تالا ردت الابتسامه :تمام الحمدالله بعد ثواني :وانت كيفك ؟
وليد ابتسم اكثر :كويس سالتي في تقدم
تالا ضحكت باحراج :ليش ايش قصدك ؟
وليد اتكى على الكنبه :لا ولاشي
ربا:هي تالوه قومي جيبيلي مويه
تالا اتنرفزت ونفسها ترد بس ماقدرت قدام وليد
تالا :حاضر وبعدين اسمي تالا (شدت في الكلمه )يارباااا
وليد يطالع فيهم و مسك جوالو وابتسم
ارسلها
تالا قامت واعطتها المويه
وفتحت اخذت الجوال وهي عاقده حواجبها
(هناك أشخاص حتى عندما يكون مزاجهم سيء يحادثونك بأدب، هؤلاء فقط من يستحقون الاحترام)
تالا تطالع وفاتحه عيونها رفعت عينها عليه ببراءة
وليد طالع فيها وهوا مبتسم واشر براسو ايوا
تالا ابتسمت
وكتبت
(ربما الادب ليس دايما السبب فيمكن ان من حولك اجبروك على الاحترام )

وليد قرأ وابتسم باعجاب
ارسلها
(ليس كل الناس تجبرك على الاحترام فقد يكون من وده قلبك اجبرك على الاحترام)

تالا تطالع وقلبها دق مع الكلام وطت راسها وماعرفت ايش تكتب
ربا بطفش:هي انتو ازعجتونا بطقطقه البيبي اقفلو الصوت وريحوني
قفلو الصوت سوا ومهم مع احد داخلين جو
تالا بعد تفكير ارسلت
(من وده القلب لايجبرك على الاحترام فقط بل يجبرك بابتسامته ان تسعد كل من حولك في اسوأ الظروف)
ارسلتها وبلعت ريقها مهي داريه كيف ارسلتها بس متحمسه تشوف ردو
وليد عدل جلستو وهوا مبتسم واخذ نفس
ارسلها
(من وده قلبي ابتسم له من قلبي لانه فيه )

تالا جسمها داااافي معنو الغرفه باردة ووجهها احمر جلست ثواني تستوعب
ارسلت
(هنا فقط يبادله قلبي الابتسامه لاحساسه بحب المبتسم له )
وليد وجهو بيتشقق من الابتسامه
ارسلها
(فلتشهد الامه باني احبك وان قلبي قد امتلكتيه بابتسامتك )
تالا قلبها وقف من الرساله ماقدرت تررفع راسها ابداااا
وليد حاس قلبو هوا اللي كتبلها ومو داري كيف كتبها
ربا بطفش:ياااخي متى بتجي ماريا والله طفشت انتو جالسين وكني جدار قدامكم مالت على المرافقين اكل وجلسه على حساب مرضي
وليد وتالا مهم معااها ولا واحد رد عليها
ربا مسكت المخدة ورمتها عليهم
كل واحد انفجع
ربا جلست :اكلم نفسي اااناااا ؟
وليد :انت ايش تبي نامي نامي بالله ترا مررة مو وقتك
تالا تضحك
ربا تطالع في تالا :سبحان مغير الاحوال قبل شويه بترميني بالكاسه وذحين فمك بيتشقق من الضحكه وبعدين غريبه اول مرة اشوفك تضحكي ووجهك محمر كذا
تالا :اممم لا ولاشي
وليد رما المخده نفسها على ربا :قولي ماشاءالله بتحسدي البنت
ربا تبا تقوم تتضارب بس الجهاز في يدها تعلي صوتها بالقوه :هييي انت مين شايفني مالت عليك حتى مالت قوووووم من عندي بالله تجيبو الهم انت وهيا ناس مريضين اعوذ بالله
وليد يضحك :خفي علينا انت يالصاحيه اول شي عدلي صوتك بعدين تعالي اتكلمي
تالا ماتت ضحك
ربا ماقدرت تصبر فكت الجهاز من يدها وقامت من السرير :انا اوريك لاحيا
ولاحشمه
وليد فتح الباب وشرد من الفجعه عشانها قامت
فتح الباب ورجع على وراا
دق في ماريا :اااااه وجع يوجع بليس ايش هوا ذا انا في كل مكان انصقع
وليد دار عليها :معليه معليه
ماريا فاتحه عينها ومستغربه :انت ايش قومك وين المرض اللي فيك
ربا تاخذ نفس :ذا ال.... نرفزني الله ينرفز بليسو هلكني
ماريا تاخذ الورد من الارض والاكياس
ربا ابتسمت :هلا والله
ماريا :هلافيك
ربا :مو لك للاكل والورد
ماريا :انقلعي
دخلو جوه
تالا تفتكر وتضحك
ربا جات جهتها :بس خلاص ترا ماصارت ترا احتراما لوجود وليدوه انا ماسويت فيك شي ولا كنت مسحت فيك الارض
تالا:لالا (غمزتلها )وانا اقدر ازعلك ؟
ربا رجعت للسرير وتركب الجهاز وماعرفت
تالا تسلم على ماريا :هلاااا والله
ماريا :هذي ليا ولا للأكل؟
تالا:لك طبعااا
ماريا:شوفي الناس مالت عليك انت قال للأكل
ربا ضغطت الزر والنيرس جات :ايوا تبي شي؟
ربا :تعالي صلحي ذا
النيرس مفجوعه :اشبو كذا؟
ربا :مالك صلاح صلحي صلحي

في احد احياء جدة
لبس واتكشخ وراح العقيقه
وبعد ساعه رجع ....
مراد فتح الباب
وجلس على الكنبه
بدور تسمع صوت فتح الباب
بدور باستغراب :انت جيت ؟
مراد :ايوا ليش ؟
بدور :لا بس استغربت ايش هوا كلها نص ساعه ولا ايه
مراد :يعني انا جيت متأخر وكذا فشويه وجابوا لعشا
بدور :اهااا
مراد يأشرلها تجلس جنبو :تعالي اوريك صورة حسن ولد علي
بدور بلعت ريقها وجات جنبو
مراد يفك جوالو ومع كل صورة بدور قلبها يوجعها :امم الله يباركلو يارب
مراد ابتسم وقفل الجوال:امين يارب
بدور مسرحه ..
مراد عارف تفكر في ايش :قومي يالله ننام والله تعبان ومهدود حيلي كمان بكرة العزومة عند اهلي
بدور ابتسمت :طيب حاضر

نايم بتعب شديد
الجوال يدق كذا مرة
فتح عيونو بتعب :اممم
ريم معصبه:بدري ياسيد رائد كان مارديت احسن
رائد اتأفف :نايم
ريم :لا والله سويت عملتك ونمت ؟
رائد يكره احد يقومو من النوم :اوهوو علينا خلاص عدلت الحجز وكل شي جاهز حتى الطياره كلمتهم على تجهيزات انها تعبانه
ريم:طيب المهم يالله قوم نروح نشوفها
رائد: ياهو بنام تعبان انا يومين مانمت
ريم:ان شاءالله عمرك مانمت مو شغلي اتحمل ذنب اللي سويتو فيها ياسلام وهيا عادي تتألم
رائد :مين قال تتألم منومه مهي داريه بشي
ريم عصبت :رااااااااائد قوووووم
رائد :امررري لله بقووم خلاص ازعجتينا
ريم قفلت
رائد رمى الجوال جنبو :ياربي ايش الحياه هذي ايش اسوي معاهم ذول
انا غلطان اني قلتلها

في الصباح
اتجهزت واتزبطت ومبتسمه لبست العبايه وخرجت
ماريا :صباح الخير
امها باستغراب :صباح النور غريبه قايمه بدري
ماريا:لا بس يعني تبت من التأخير الاخير مالحقت شي فقلت خليني اقوم بدري احسن
امها :اهاا يالله الله يوفقك
ماريا:تبي شي ؟
امها :لاسلامتك بس حاولي ماتتأخري اخوك حيجي بدري
ماريا:طيب ان شاءالله

خرجت والسواق مستنيهاا
بعد ربع ساعه وصلت
عدلت الطرحه ونزلت مبتسمه
اتوجهت للقاعه
القاعه فاضيه
ماريا :يوووه ايش ذا هوا انا يا اجي بدري مرة يامتأخر مرة
الباب انفتح
ماريا دارت
احمد باستغراب :ماشاءالله جايه بدري اليوم
ماريا ابتسمت :لا بس يعني امس اتأخرت فقلت الحق اليوم كلهم بدأؤ الا انا
احمد ابتسم باسف :اممم
ماريا انتبهت بس ماعلقت
احمد جلس على الكرسي واتنهد ...
ماريا جلست بعيد شويه وساكته
احمد بتسريح:شكلو احد ثاني حيكمل معاكم شغل
ماريا انفجعت :ليش؟؟؟
احمد باسف:امم انا حشتغل في مكان ثاني
ماريا انصدمممممت :ليش طيب؟
احمد :والله ابويا وعمي مسوين شركه ويبوني اديرها وتعرفي الميزانيه كيف حتكون اللي هنا ولاشي
ماريا :امم طيب وانت عاجبك الشغل هناك
احمد :انا احب شغلي هنا بالمرة يعني اعشق الديكور واحب اصمم والهندسه وكل ذا الشغل اما شغل الشركات لا بس قلتلك فيها ضمان مستقبل
ماريا باسف:طيب براحتك ... قامت :انا حخرج بره لين تبدأ المحاضرة
احمد :ماريا
ماريا دارت عليه :نعم؟
احمد :انا متحمس اشوف شغلك وابداعاتك وحجي واتابعك لاتخيبي ظني فيك
ماريا ابتسمت :ان شاءالله يشرفني اكيد
احمد ابتسم :الله يوفقك يارب
ماريا :امين ويوفقك في شغلك
احمد :صراحه انا اللي يشرفني اني اتعرفت على وحدة زيك معني ماكنت اتوقع اني ممكن احد يقنعني من البنات
ماريا استغربت:ليش ؟
ماريا جلست
احمد:ما ادري بس انا من صغري لين ذا العمر ما احتك فيهم ولاعندي اخوات (افتكر تالا)
ماريا حزنت :طيب يسعدني اكون اول طالبه تتعرف عليها
احمد ابتسم بدون مايطالع فيها :مو بس اول طالبه او بنت واول صديقه وماتدري يمكن تكون اول (سكت)
ماريا انحرجت :امممم
احمد ضحك : طيب انا حخرج وكيف حتواصل معاك بعدها ؟اقدر اخذ رقمك؟
ماريا :ايوا طبعا
احمد :مسك جوالو
ماريا اعطتو الرقم
احمد مبتسم :طيب متواصلين ان شاءالله
ماريا :اكيد
احمد :يالله ياطالبتي اتفضلي
ماريا ضحكت :حاضر يادكتوري
خرجت تتمشى وتدور مهي عارفه تنبسط ولا تزعل
احمد مسك جوالو واتصل
ابو حسين رد :ايوا الو
احمد:انا موافق
ابو حسين ماسك ورق في يدو سابو :والله ؟
احمد :ايوا بس متى ابدأ شغل
ابو حسين يعني كذا بعد يومين ان شاءالله
احمد :طيب كويس عشان اخلص شغل هنا
احمد :يالله مع السلامه
ابو حسين مع السلامه
قفل وكلم ابو ريم يبشرو

واقفه عندها تطالع بحزن
ريم :يااارب قومها بالسلامه يارب
رائد دخل واتحمحم :السلام عليكم
ريم دارت عليه :وعليكم السلام
خرجت بره الغرفه
رائد طالع في تالين ونزل بعدها من الغرفه
ريم جلست متى الرحله ؟
رائد :8 الصباح
ريم :يعني حنروح المطار متى ؟
رائد:يعني سبعه الا شي زي كذا
ريم:امم طيب انا حروح ارتب اغراضي
رائد :طيب وجايبتني عشان تقوليلي ذا الكلام ؟
ريم بدون أي تعبير :اعتقد انو كلام ضروري
رائد اتأفف :ايش هوا ذا لعبه انا في يدك
ريم :ولا تالين لعبه في يدك
رائ :ياشيخه طفشتي اهلي تررا خلاص يكفي لوم يكفيني اللي فيا
ريم :اللي فيك مايجي شي عن اللي فيها
وقفت وخرجت عبدالحميد يستناها

الجرس يدق
الشغاله فتحت
مراد وبدور :السلام عليكم
الشغاله :اهلين مدام بدور
مراد :لنا الله حتى ذولا مايسلمو عليا
بدور تضحك :انت ايش تبا
مراد:يالله عادي اروح عند امي ذحين
دخلو
ام مراد :هلااا والله بولدي ياهلا بالغالي
مراد اتوجه لامو وسلم على راسها ويدها :هلافيك والله
بدور جات وسلمت على راسها :كيفك خالتي
ام مراد :هلا بمرت الغالي هلا والله
الشغاله اخذت عبايه بدور وبدور جلست
مراد جنب بدور مقايل امو على الكنبه في الصاله
ابو مراد نازل من الدرج بالثوب وهيبتو معروفه في العيله كلها
ابو مراد :السلام عليكم
مراد قام وسلم على يدو وراسو :وعليكم السلام الحمدالله على السلامه يا ابويا
ابو مراد :الله يسلمك ياولدي كيفك ؟
اتوجهو اثنينتهم للكنبه
مراد يجلس :الحمدالله بخير كيف السفره ؟
ابومراد:والله تمام انا جيت بس ابو وليد راح لمكه (ابو مراد وابو وليد تجارتهم عاديه بس يسافرو مع بعض بين فتره والثانيه )
مراد :اهاا ماشاءالله
بدور :كيفك ياعمي ؟
ابو مراد :هلا ببنتي الحمدالله انت كيفك ؟
بدورباحراج الين ذحين وهيا تخاف منو :الحمدالله
مراد :وين ماريا ؟
ام مراد :ذحين تجي في الجامعه هيا
مراد :اهاا
ام مراد :ها في شي في الطريق ولا ؟
ابو مراد اعطاها نظرة
ام مراد سكتت
مراد اتربك :لا والله ان شاءالله الله يكتب اللي فيه الخير
بدور موطيه راسها وقلبها وجعها
ماريا دخلت
مشيت باتجاههم :السلام عليكم
باصوات متفاوته :وعليكم السلام
ماريا سلمت على ابوها وامها واخوها ومرتو
جلست جنب بدور :يالله وينك من زمان عنك وحشتيني
بدور ابتسمت :وانت اكثر والله موجودين بس اخوك وشغلو
مراد طالع فيها بنص عين على كذبها وابتسم بخبث
بدور وطت راسها
مراد :طيب ايش هوا جدار انا عندك ؟اسالي كيف اخبارك ؟
ماريا :يالله على الغيرررره
ابو مراد :يالله حطو الغدا انا بكلم شويه وجاي
بدور وماريا :احنا حنقوم نجهز
ام مراد قربت من ولدها :هي انت اتلحح شويه وخليني ازوجك
مراد :يا امي الله يهديك كم مرة نتكلم في ذا الموضوع
بدور نسيت جوالها ورجعت تاخذو
مراد مقابلها وام مراد معطيتها ظهرها
ام مراد :ياولدي ابا اشوف ولدك ايش هوا ذا انت لو تخليني ازوجك بس راسك يابس
بدور اتصلبت مكانها ودمعتها نزلت فجاه
مراد انفجع لما شافها واتوجه لها
بدور مسحت دمعتها عشان لاتشوفها خالتها
ام مراد اتأففت وحطت يها على خدها :وين يتزوج ذا شوف كيف جري عليها
(انتهي البارت العاشر)


نونا شهاب غير متواجد حالياً   رد مع اقتباس
إضافة رد

أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
العدل والظلم ( 2 ) العدل والظلم في ميزان الإسلام ( 24 ) موقف الإسلام من العدل والظلم ع اللحيدان المنتدي الاسلامي (الشريعة و الحياة) 46 12-01-2014 12:00 PM
آشيو الحرامي: “الخضر” مرشحون للتأهل إلى البرازيل وحاليلو يملك كل إمكانيات تحقيق ذلك روليان غالي منتدي كرة القدم العربيه 1 09-27-2013 11:03 PM
جدول الليغا لـ موسم 2011 - 2012 : عبدالرحمن حساني منتدي كرة القدم العالميه 6 09-24-2011 07:42 PM


الساعة الآن 05:30 PM.


Powered by vBulletin® Copyright ©2000 - 2017, Jelsoft Enterprises Ltd.
المقالات أو المشاركات أو الآراء المنشورة في شبكة منتديات برق بأسماء أصحابها أو بأسماء مستعارة لا تمثل بالضرورة الرأي الرسمي لشبكة برق بل تمثل وجهة نظر كاتبها.