قديم 02-24-2017, 03:40 PM   #1
اردنية وكلي فخر ❤
 
الصورة الرمزية أنثى السحاب
 
تاريخ التسجيل: Dec 2012
الدولة: المملكة الاردنية الهاشمية ♡
المشاركات: 19,814
معدل تقييم المستوى: 10
أنثى السحاب will become famous soon enough
افتراضي انت عمري بقلم مال الشام




-1-
الساعة 1:30 بالليل…
كنت عم حاول ادرس… قربت من الشباك
فتحت البرداية و دئ البي… كان القمر بدر
و السما صافيه… ما فيها و لا غيمة و لا نجمة
بس القمر عم يتغندر و ينور الدنيا… نسمة باردة

حسيت انو كتير محتاجتلو… كان نفسي اسمع صوتو
مسكت الموبايل و دئيتلو… ما رد يمكن نايم
طبعاً نايم مين رح يضل صاحي بهل وقت…

حسيت في شوق بقلبي ما بينوصف… شغلت ام كلثوم…
اغنيتي انا وياه... لما قالت: ابتديت دلوقت بس أحب عمري
ابتديت دلوقت اخاف لا العمر يجري
كل فرحة اشتاقها من قبلك خيالي
التقاها في نور عنيك قلبي وفكري
يا حياة قلبي يا أغلى من حياتي
ليه ما قابلتش هواك يا حبيبي بدري
اللي شفته قبل ما تشوفك عينيه
عمر ضايع يحسبوه إزاي علي ّ

ابتسمت…. تزكرت ملامحو الهادية..
دقنو الاشقر… شعراتو الي عطول بنزعلو ياهن
و كنزتو الحمرا الي وقت يلبسها بطلع البي من مطرحو…

مابعرف كيف مرقت هي الليله… صحيت على صوت المنبه و كنت متاخرة
لبست بسرعه و اخدت تفاحة معي و نزلت…

صدفة غريبه خلت شوفير الميكرو يشغلي اغنيتي الي بحبا
بس ما بعرف ليش نغزني البي:
رجعوني عنيك لأيامي اللي راحوا
علموني أندم على الماضي وجراحه
اللي شفته قبل ما تشوفك عنيه
عمر ضايع يحسبوه إزاي علي

رن موبايلي… (( إنت عمري)) يتصل بك..

هو: صباح الخير يا حلوة

** اشتئتلك يا ظالم… والله لو ام كلثوم عايشه كانت زعلت منك اد ما بتخليني اشتئلك

هو: طيب يا حياتي كنت نايم… اسمعي انا حابب عوضك

** مابدي مشي الحال

هو: اسمعي العرض طيب، عازمك ع الفطور

** موافقه… لا لا مو موافقه

هو: ههههه خلص موافقه… ناطرك انا

** زياد عندي محاضرة رح يرسبني الدكتور ازا بغيب كمان

هو: انتي حرة

** ممممم… ليكني وصلت وينك؟

هو: شفتك…

سكرت الخط و رحت لعندو

** وين عازمني؟

هو: و المحاضرة؟

** لك جوعانه… وين عازمني

هو: لك اطيب سندويشة فلافل لعيونك

** توقعت… يلا مشي

هو: ليكون ما عجبك

** لا يوه عجبني اصلا فلافل عم ابو محمد بتطير العقل…

………….

** زياد

هو: جبلك وحده تانيه؟

** لك تضرب لا…

هو: لكن؟

(( كان عجئة حوالينا، الشام موردة متل العادة … صبايا كتير
و جنبنا شب وصبيه قاعدين هيئتهن متخانئين و عم يحاول يصالحها… و انا و زياد عم ناكل و نضحك قبل ما احكي شي… سمعت ام كلثوم للمره التالته و لنفس الاغنية ))

ليه ما قابلتش هواك يا حبيبي بدري
اللي شفته قبل ما تشوفك عينيه
عمر ضايع يحسبوه إزاي عليّ
أنت عمري اللي ابتدي بنورك صباحه
الليالي الحلوه والشوق والمحبة
من زمان والقلب شايلهم عشانك
دوق معايا الحب دوق حبة بحبة
من حنان قلبي اللي طال شوقه لحنانك

حسيت انو انمغصت.. تكركبت و توترت… عم ابو محمد اول مره بشغل هي الاغنية… ونسيت شو كنت بدي قلو… حسيت دمعة بعيوني.. و تركت السندويشة من ايدي…

هو: ديما شبك؟ شووو في؟

** مابعرف خايفه

هو: من الدكتور؟ انا اسف انا الي بخليكي تغيبي ع طول

** لا مو هيك بس مابعرف ليش هيك حاسه..

سكت زياد و بعدا ابتسم و قلي تعي معي… مسكني من ايدي و قام لعند عم ابو محمد…

هو: كيفك ياعم…

ابو محمد: اهلين زياد… كيفك ديما؟ … اعمللكن كمان سندويش؟

هو: بدي اطلب منك طلب

ابو محمد: قلي

هو: خليني اقلي الفلافل و ديما تلف السندويش

ابو محمد فتح عيونو و حك راسو… و انا قلتلو بالله شووو

زياد قرب لعند ابو محمد و قلو شي ما سمعتو… ابتسم ابو محمد و قلنا يلا تعالو و انا تربطت ايدي و بالفعل بلش هو يقلي و انا مصدومة!

هو: لك لفي السندويش

** بالله! شو عم تخبص

اجا ولد صغير اعطاني 10 ليرات قلي خالتو لفي سندويشة
الي بالمحل اتطلعو علينا و ضحكو… ضحك زياد
و انا صرت اضحك… قلتلو يلا خالتو

و صرت لف سندويش و العالم تجي تطلب كتير… و كل ما يجي شب و صبيه يقلهن حسابكن واصل ما يخليهن يدفعو…
هيك زياد
طول عمرو مجنون…

كنت عم حط فلافل و خلص الصحن اخدتو و رحت لعندو..

** حطلي فلافل
هو: ليش خلصتيهن بسرعه
** حطلي بسررعه حرام في ولاد بدهن سندويشات
و صرت امسح جبيني من التعب…
قلي غمضي عيونك لحطلك
** زيااد يلا
هو: غمضي

** غمضت… حطلي كتير يلا

و انا مغمضه اشتغلت اغنية انت عمري… حسيت دئات البي زادت… خفت فتح عيوني
حسيت ازا فنحتهن ما رح لاقي زياد واقف قدامي..

هو: حبيبي فيكي تفتحي

** لا شيل الاغنية لفتح عيوني

هو: لا بتحلمي… افتحي يلا

فتحت عيوني شوي شوي… اتطلعت بالصحن
كان محطوط ورقة بيضا و فوقها خاتم!!

#مال_الشام
#انت_عمري_بقلم_مال_الشام

-2-

** لك تؤبر البيييييي…
هو: بعيد الشر… يلا اتركي الفلافل من ايدك تعي نغسل و نروح نلحق محاضراتنا
**و الخاتم!!
هو:البسيه؟
**لا ما حزرت بدك تجي معي عالبيت تلبسني ياه قدام امي
هو:بس هاد فضة مو دهب… بعدين اتفقنا لنتخرج
** هلأ يعني هلأ!!
هو:ديما حاجتك يلا عنا محاضرات..
** زياد… عم ئلك هلأ! ..
هو:متاكدة؟
** متأكدة
هو: يلا…
** متأكد؟
هو: بدك تجننيني؟
** هههههه بمزح معك… يلا تعال…

عالطريق كان صافن… و بالو مشغول
و انا كنت عم اتطلع بملامحو و كتير مبسوطة… هو كان خايف لان مو جاهز… بس انا كنت كتير جاهزة.. و كتير بحاجتو…

**لك ليش وقفت عالباب تعال فوت
هو: فوتي خبريها بالاول
** ههههه بتعرف
هو: كيف بتعرف! انتي اصلا ما كنتي بتعرفي انو جايبلك خاتم… بعدين امك شو عرفها انك بتحبي؟
** ابن جيرانا يقصو لسانو مخبرها بس استغربت ردة فعلها قالتلي جيبيه بدي شوفو..
هو: يا حبيبي يعني عاملين انتي و امك عصابه علي
** ههههههه ايه يلا تعال
هو: يا بنت امك بتخوف… بلكي قتلتني!
** لك تضرب ايه… انا بعتلها مسج بتكون ناطرتنا فوووت يلاااا

انا كنت وحيدة امي… ابي طلقها من زمان و تركني عيش معا… هي كانت امي و اختي و رفيقتي…
فتنا و البيت كان هادي كتير
ريحة قهوة… و صوت المروحة…

** احم احم… ماما زياد اجا

هي: اهلين ديما… اهلا خالتي تفضل

هو: كيفك خالة

هي: تمام يا ابني.. اقعدو…

كانت امي عامله فنجان قهوة الها… قعدت و شربت منو…
كل رشفه كان عرق زياد ينزل اكتر
هدوء و مافي الا صوت المروحة… توترت انا كمان… كنت خايفه احكي شي مو بمحلو...زياد يتطلع فيني و عيونو فيهن توتر
و انا ابتسملو ليهدا… هيك لوقت ما حكت امي..

هي: امي اتركينا لحالنا

** ليش ماما؟

هي: بدنا نحكي كلمتين… فوتي ع غرفتك

ما كان فيني ناقش… فتت… سكرت الباب و كنت متوترة كتير..

]] هي: ايه خالتي قلي… عندك بيت؟
هو: لا بس ان شاء الله بيفرجها و بصير عندي
هي: عندك سيارة؟
هو:.. … … لا.. … ..
هي: عندك رصيد بالبنك؟
هو: خالتي المصاري مو كل شي
هي: سألتك… عندك رصيد بالبنك؟
هو:لا
هي:ابوك شو بشتغل؟
هو: موظف حكومي
هي :امك؟
هو: ست بيت…

هي: ديما… يا ديما تعي امي..

طلعت و انا ملهوفة لاسمع شو صار…
بس زياد كان قاعد و شابك ايديه و كان عم يضغط عليهن.. عرفت لان عروقو كانو واضحين
ما عرفت شوف ملامحو لان كان منزل راسو..

** ايه.. شو؟
هي: حبيبتي انتو مو مناسبين لبعض..
** مين؟ انا و زياد؟
هي: ايه
** هههه نحنا اصلا خلقنا لبعض..

رحت قعدت جنب زياد و انا عم اضحك ضربتو ع كتفو..

** شبك معصب..

هي: بس انا قلت انكن مو مناسبين لبعض

** هلا عم تحكي جد! … ليش شو في

هي: ابني زياد فيك تتفضل شكرا ع زيارتك..

انا طار عقلي… و زياد وشو احمر كتيررررر كتير
وقف و لسه ضاغط على ايديه و ما اتطلع فيني بنوب..
مسكت ايدو بقوة

** لك وين رايح

هو: لو سمحتي ديما بدي امشي

** شبك ببساطة بتتخلى عني!!

هو: ديما مافي شي احكيه

** بس انا عندي شي احكيه، امي هاد قراري انا… و حياتي انا و مو انتي الي بتقرري ازا بناسبني اولا
و انا طالعه مع زياد لان ازا بطلع بدوني رح تطلع روحي..

هي: لا ما رح تطلعي معو بتعرفي ليش؟

** ليش؟

هي: لان بغضب عليكي ليوم الدين و بيحرم علي شوف وشك او قلك بنتي… حتى ازا متت بوصي ما تعرفي وين قبري

**لك امي شو عم تحكي انتي مشان الله

هو: خلص ديما، يبدو مافي نصيب

حكاها… و رفع وشو و كانو بعيونو دموع… قلي كل شي الا غضب الوالدين… سامحيني…

و ترك ايدي و طلع… سمعت صوت الباب و هو عم يتسكر
و من وقتا… لهلا
مرق سبع سنين على تسكيرت هاد الباب…

#انت_عمري_بقلم_مال_الشام

-3-

كنت قاعده على البلكون… عم اتفرج ع الطرقات…
و عم اتزكر… عم اتزكر ضحكتو.. حكياتو… جنونو..
و صارت تمرق ببالي الافكار

// اول سنه..
هي: لك يا بنتي مشان الله تاكلي الك شهر ما عم تاكلي لك بتمرضي
** انا بدي موت… مابدي هي الحياة
هي: ياربي تصبرني… انا ما رح زتك على هالجحيم بايدي فهمانه //

// تاني سنه..
هي: ديما… حبيبتي… انا خلص تعبت
ما عاد فيني شوفك بهل حالة… ازا بتحبيه لهل درجه، رح اسمحلكن تتجوزو
** هه.. اتجوز مين انا مابعرف وينو، مابعرف شي عنو..
انا رح جن مشان الله يا امي تلاقيلي ياه مشان الله ما عم اقدر عيش… بيوس ايدك تلاقيلي زياد //

// تالت سنه
مها: مرحبا ديما انا متصله عليكي بخصوص زياد
** زيااااااد… انتي قلتي زياااد!! عرفتي وينو؟؟؟ احكي احكي

مها: ايه عرفت بس الاخبار مو منيحه

** صايرلو شي؟

مها: لا بس… يعني والله مايعرف شو بدي قلك… بس
عن طريق الصدفه عرفت انو… انو
زياد متجوز!!

** هههههه لا انتي مخربطه

مها: والله متاكده… متجوز و مرتو حامل

//

// رابع سنه

هي: يامو لايمت بدك تضلي ترفضي الخطابة… انتي عم تكبري و زياد شايف حياتو و تجوز… بكفي امي

** ما رح اتجوز… كل عمري، حتى لو تجوز زياد اربعة

//

// خامس سنة

خالتي: البقية بحياتك يابنتي، الله يرحمها و يجعل مثواها الجنة
بنتي لازم تجي تعيشي معي انتي صبيه و هلا امك ماتت و ما بيسوا تعيشي لحالك

** انا ما رح اطلع من هاد البيت… ابدا

و هيك كانت حياتي… هي السنه السادسه
لسه بسمع ام كلثوم…
و لسه باكول سندويش فلافل من مطعم عم ابو محمد بس هو ما عاد اشتغل ولادو بيشتغلو..
ولسه عندي عقده من تسكيرت كل باب…
انا تعبت… تعبت يا الله اديش تعبت
معقول ما سمع بوفاة امي؟
معقول ما خطرلو يتطمن علي!
حاج تعبت… بكفي بكفي بكفيييييي

** الو كيفك مها

مها: هلا حبيبتي تمام كيفك انتي

** مها بدي منك خدمه… بدي رقم زياد

مها: اوووه… مايعرف عنو شي

** مشان الله انا ما بقى عم اتحمل… لازم واجهو لازم احكي معو لازم قلو انو انا لسه عم استناه كل يوم
عم شوفو بكل المطارح
عم اتنفسو… بدي قلو انو من وقت ما راح عم خاف سكر اي باب
بدي قلو انو ما تخيلت يتركني بنوب… كنت ناطرتو كل ثانيه…
انا تعبت تعبت تعبت

مها: خلص اهدييييي اهدي… انا مافيني ساعدك الا برقم مرتو
لان وقت حكيتك كنت ماخده رقم مرتو فكرتك رح تطلبيه و ما طلبتيه…

** رقم مرتو!!! شو بدي اعمل فيه!

مها: والله مابعرف بس هاد الي معي…

** طيب ابعتيه…

ما كان عندي جرأة اتصل… الا لبعد 8 شهور…

وقتا كان شتوية… مطر كتير
عايشه لحالي…
حاطة خبز ع دفاية المازوت… و عم يرجفو ايدي و انا عم اكتب الرقم…

** الو

هي: الو؟

** مين معي؟

هي: انتي الي متصله!!!

** انا… انا ديما… يعني انا

هي: ديما؟؟ … انتي ديما ما غيرها؟

** يمكن انتي غلطانه انتي ما بتعرفيني

هي: لا انتي الغلطانه انا بعرفك… بعرفك كتير منيح... بدي شوفك

#مال_الشام
#انت_عمري

-4-

فتت ع المطعم… كنت كتير خايفه بس البي عم يدئ
اد ما كنت خايفه اد ما كنت مبسوطة
هي مرتو… من ريحتو ههههه
كانت مخبرتني شو رح تلبس… تيور رمادي…

شفتا كانت ع الطاولة الي جنب الشباك….
كانت هاديه ومو مبين عليها العصبيه…
كنت بدي ارجع ع البيت… رجلي ما حملوني..
بس هي رفعت عيونا و عرفتني.. و اشرتلي بايدها…

ابتسمت… و قربت من طاولتها… ما كنت قادرة احكيلها كيفك.. و لا مرحبا
سحبت الكرسي بهدوء… و قعدت.. مجرد ما قعدت سمعت شي خربطلي كل كياني
كانت هي
اي اي هيييي هييي
ام كلثوم… ام كلثوم كانت هي عم تغني

رجعوني عنيك لأيامي اللي راحوا

علموني أندم على الماضي وجراحه

اللي شفته قبل ما تشوفك عنيه

عمر ضايع يحسبوه إزاي عليّ

أنت عمري اللي ابتدي بنورك صباحه

قد ايه من عمري قبلك راح وعدّى

يا حبيبي قد ايه من عمري راح

ولا شاف القلب قبلك فرحة واحدة

تجمدت و زادت نبضات قلبي…
صرت خبي عيوني
العب باصابعي
رفعت ايدي و ندهت للجرسون

** لو سمحت ممكن تغير الاغنية؟
هو: عفوا بس المدام هي الي طلبتها… و اشرلي ع مرت زياد
** تلبكت كتير… و قلتلو طيب اوك… شكراً الك..

و هون بلشت هي بالحكي… كان اسمها ميساء…

ميساء: زياد قلي… انو هي اغنيتكن… كان كتير يحبا

حكيها صدمني!! ما عرفت رد

ميساء: هههه ليش مستغربة… انا بعرف كل شي بس في شغلات انتي ما بتعرفيا و انا حبيت شوفك لقلك ياها

** قولي… بدي اسمع كل حرف

ميساء…: ممممم من وين بلش؟
انا تجوزت زياد و انا على علم بعلاقتكن… و على اتفاق انو زواجنا ما رح يتتوج بالحب المتبادل ابدا
مع اني كنت اعشقو

** ازا ما بحبك ليش تجوزك؟

ميساء: لنفس السبب الي تركتيه كرمالو… انتي تركتيه كرمال امك و هو تجوزني كرمال امو

** طيب؟

ميساء: بعد 5 شهور فاجئني انو بدو يطلق!! … بس انا كنت حامل… اتفقنا انو نضل سوا لخلف و بعدا مننفصل..

** ليش بدو يطلق!!

ميساء: ههههه ليرجع لعندك.. بس انا كنت تعلقت فيه كتير و قربت ولادتي.. و صار لازم لاقي حل مشان ما يطلقني

** شو كان الحل؟

ميساء: الحل كان انو احكي مع مرام… بتعرفيا لمرام مو هيك؟

** رفيقتنا من ايام الجامعة؟ طبعا بعرفا كانت دايما ع تواصل معي بس شو دخلها؟

ميساء: و هي كانت ع تواصل دايم مع زياد كمان كان يحكي معا قدامي و يسال عن كل تفاصيلك و ما يراعي مشاعري ابدا بس كنت اتحمل كانت تجبلو اخبارك … و وقت قربت ولادتي خفت كتير و حكيت معا… طلبت منا تخبر زياد انك تجوزتي و تعبت لاقنعتها و قلتلها انو زياد حياتو موقفه و رح تجيه بنت و بدو يطلقني… لوقت ما اقتنعت

حسيت الدنيا فتلت فيني!!! عيوني جمدو و الدم غلي بعروقي… و هي سكتت…
كنت عم اتطلع فيها و محتقرتها كتير… هي تكركبت… مسكت كاسة المي و شربت منها… و كملت حكي

ميساء: مرت سنه و انا خلفت و زياد ما شاف بنتو كان بحالة غريبه بس انا كنت كتير مرتاحه لان بطل يحكيلي شي عنك و ما عاد جبلي سيرة الطلاق ابدا

** كيف طلع من قلبك تعملي هيك؟

ميساء: بس انا بدي صلح غلطي!

** كيف؟ بدك ترجعيلي عمري؟
بدك ترجعيلي دموعي؟

ميساء: لا بدي رجعلك زياد..

** ما فهمت

ميساء: ليكي انتي بتلفون واحد ممكن تتصلي فيه و تقليلو انو انتي ما تجوزتي و رح يزتني بالشارع و يتجوزك…. بس انا عندي بنتين و هلا حامل، … بدي منك سنه
سنه لخلف عند جوزي و بعدا انا رح ارجع لعند اهلي… و بجي باخدك لعندو بايدي

** شو عم تخبصي!!

طلعت من شنتتها صور ولادها و صورة الايكو للبيبي الي ببطنها… حطتلي ياهن ع الطاولة…

ميساء: تحملتو سبع سنين… بدي بس سنه
ليكي بنتي الكبيرة اسمها ديما. كرمالها اتركيني عندو بس لجيب ابني

** و بس يصير موعد ولادتك رح تلاقي لعبة جديدة؟

ميساء: وحيات ولادي بعد سنه من هلا رح اجي و اخدك لعند زياد بايدي… والله والله والله

** سنه!!!

ميساء: بترجاكي…

سكتت و ما كنت فهمانه شي

ميساء: شو قلتي؟

#مال_الشام
#انت_عمري

-5-

فكرت كتير قررت كون انانية و فكر بمصلحتي انا… لقيت من مصلحتي استناها لتجيب ابنها و يشوفو زياد و و من مصلحتي تتطلق برضاها… بعد كل هالصبر لازم نبلش بهدوء

** طيب بس بشرط

ميساء: موااافقه

** لتسمعي بالاول!

ميساء: شو ما كان موافقة… قليلي شو

** انك تكوني رضيانه و ما تضغطي ع زياد بولادو و تخليه يشوفهن متى مابدو و ما تطلبي ترجعيلو ابدا بأي وقت!

ميساء: ماشي… قبلت

** اليوم شو تاريخ؟

ميساء: 2012/1/23

** كم الساعه؟

ميساء: 4:30

** طيب ب 2013/1/23 الساعه 4:30 رح اجي لهون بلاقيكي انتي و زياد

ميساء: طيب..

** انا هلا رح روح… عن ازنك

طلعت و الدموع بعيني ما عرفت هن فرح و لا حزن
ما عرفت ليش كل هالظلم
ما عرفت ليش القدر مصر يبعدنا عن بعض… اشتقتلو
اشتقتلو اشتقتلو… سنه!
كيف بدي اتحملها…
هههه ياربي بعد سنه رح شوفو
بعد سنه رح نتجوز
رح شوف زياد!!!
صرت عد الدقايق… صرت عد الثواني بلشت اهتم بحالي كتير
طلعت المصاري الي تركتلي ياهن امي الله يرحمها
جددت البيت
زرعت زريعه عالبلكون
جددت الفرش
دورت ع شغل..
صرت حاول يمرق الوقت…
كنت عد النفس الي بتنفسو…
الايام الي عشتها معو متل السحر!
رح نعمل هي غرفتنا
و هي للاولاد
رح اقنعو نعيش بهاد البيت
نبلش حياتنا من مكان ما وقفنا
اديه رح يتفاجئ لما يعرف انو ما تجوزت و لسه بنطرو
ههههه يارب… يارب…
مرت الايام بصعووبة اكتر مما حدا يتخيل…
بيوم رحت جيب فلافل من محل عم ابو محمد… ما لقيت اولادو
سالت عنهن خبروني انو ابو محمد بالمستشفى و عم يموت…
فز البي
احلى ايام عمري مرت هنيك…
حملت حالي و رحت عالمستشفى…
سالت عن غرفتو… سلمت ع اولادو
و سمحولي فوت لعندو بسرعه

فتت بستو ع راسو
رجعت لذكريات بتجنن
وقت كان زياد يجبلي الصبح سندويشه قبل ما فوت ع محاضرتي
و لما مره زعلت منو قام شكاني لابو محمد
و مرة وقت فات عالمحاضرة و قال للدكتور اني نسيت سندويشة الفلافل و الدكتور قلعو…

سالتو عن صحتو بالاول ما عرفني بس زكرتو بحالي و سالني ازا تجوزت انا و زياد و قلتلو لا..
قلي بتعرفي اخر مرة جيتو فيها لعندي مع بعض؟ و صرنا نتزكر و نضحك و قتا تزكرت لما زياد قرب و قلو شي و انا ما سمعت… ف سألتو

** عم ما بعرف ازا بتتزكر بس اخر مرة وقت قلك زياد تخلينا نقليي الفلافل… قلك شي بادنيك انا ما سمعتو و سمحتلنا نعمل هالشي… شو قلك؟

ابو محمد: ايه بتزكر… ما بنسى وقتا قلي (( بس تزعل روحي بتدبل… خليني فرحها)) …

طلعت من الزيارة و كلماتو عم ترن بادني… حسيت قلبي رح يطلع من مطرحو و ما عاد تحملت…
رفعت التليفون و رنيت على ميساء

** الو

ميساء: اهلين ديما

** خلفتي؟

ميساء: اها ليش بتسالي!

** انا ما عاد فيني اتحمل… هلا جيبي زياد و تعي

ميساء: بس مو هيك اتفاقنا

** ميساء بكفي.. بدي شوف زياد ازا ما بتجو رح اسال عن بيتكن و اجي

ميساء: مصره؟

** ايه… انا سابقتك ع المطعم…

رحت متل ما انا… مشيت بسرعه و كنت مستعجله و حاسه بغصة
اديش اشتئتلو
اديش بحبو
سامحتو ع كل شي بدي بس ضحكة من عيونو
مابدي شي…
فتت و نطرت ع نفس الطاولة..
ضليت راقب الساعه و ايدي عم يرجفو… عيوني معلقين بباب المطعم… احساس ما بنوصف بأي كلمه…

طلعت من دوامة افكاري لما شفت ميساء جايه لعندي..
ما كان في حدا معها…
اجت و قعدت عللكرسي و قالتلي مرحبا كيفك
و انا لسه عيوني ع الباب!!

ميساء: ديما وين عم تطلعي

** وينو؟

ميساء: مين هو؟

ما عاد سيطرت ع حالي… صرت ضرخ و العالم تتفرج علي

** وينووووو وينووو

ميساء: لك خلص هس هسسسس

نزلو دموعيييي… خلص ما ضل عندي قوة لاتحمل شي

** امانه وينو… ببوس ايدك بدي شوفو

ميساء: هيك بدون ما تطلبيلنا قهوة؟

** ميساء… انا عملت الي بدك ياه… وينو زياد ليش ما اجا معك

ميساء: انا كنت بدي جيبو بس ما قدرت

** ليش!

ميساء: هههههه قال ليش… والله انتي بتضحكي… في ميت بيطلع من قبرو

** ميت شو! … شو؟ شبك انتي؟

ميساء: ليكي… انا وقت كنت حامل بتمارة… بنتي التانيه
مات زياد الله يرحمو… مات بجلطة… قلبو تعب ع فراقك ههههه… ايه و انا بس رنيتيلي فكرت كتير كيف عزبك متل ما تعزبت و انا عايشه مع واحد بصبحني و بمسيني بسيرة حبيبتو!! يعني بالمشرمحي… انا بس اخدت حقي… نطرتك سنه على امل رجوعو و هلا بح! هههههه ما في شي نتخانئ عليه… بتعرفي شو رايك نصير رفقات؟

** زياد مات؟

ميساء: ايه… من خمس سنين
زياد مات…

ودعوني عنيك للأيامِ اللي راحوا

علموني أندم على الماضي وجراحه

اللي شفته قبل ما تشوفك عنيه

عمر ضايع يحسبوه إزاي عليّ

تمت

للكاتبه مال الشام


0 للاطفال تعليم الوضوء والصلاة بالصور
0 عدت بعد غياب...أهلاً وسهلاً بك
0 علاقة انزيمات الكبد بحصوات المرارة
0 علمتني الحياة
0 دائما ضع في ذهنك فكرة
0 رحلت من دوني
0 استشهاد 5 من مرتبات المخابرات اثر تعرض مكتب مخابرات البقعة لهجوم مسلح دنيء
0 إحـتضن الآمَـل كَـما تـحتضن الـورد
0 ﻗﻨﺎﺑﻞ ﻭﻫﻤﻴﺔ ﻻﺛﺎﺭﺓ ﺭﻋﺐ ﺍﻟﻤﺼﺮﻳﻴﻦ
0 اكثر وحده منحوسه
0 ‎من أحب يلتمس 1000 عذر
0 ﻗﻄﻊ ﺍﻟﺤﻠﻮﻯ ﺍﻟﺼﻐﻴﺮﺓ ﺑﺎﻟﺠﺰﺭ
0 ﺃﺭﻳﺪﻙ ﻟﻲ ﻭﺣﺪﻱ ....
0 ﺗﺨﻴﻠﻮﻭﻭ ﺍﻣﺮﻳﻜﺎﺍ ﺗﺘﺼﻨﺖ ﻋﻠﻴﻨﺎﺍ
0 أنواع القلوب في القرآن
التوقيع

قال دوستويفسكي لزوجته وهي على فراش الموت : لم أخنك حتى في الذاكرة ! ❤🌸

اضغط هنا لتكبير الصوره


أنثى السحاب غير متواجد حالياً   رد مع اقتباس
قديم 03-14-2017, 10:56 AM   #2
-||[قلم من الماس]||-
 
تاريخ التسجيل: May 2008
الدولة: فلسطين
المشاركات: 870
معدل تقييم المستوى: 10
mhmdd is on a distinguished road
افتراضي


قصة رائعة جدا

يعطيك العافية


mhmdd غير متواجد حالياً   رد مع اقتباس
إضافة رد

أدوات الموضوع

تعليمات المشاركة
لا تستطيع إضافة مواضيع جديدة
لا تستطيع الرد على المواضيع
لا تستطيع إرفاق ملفات
لا تستطيع تعديل مشاركاتك

BB code is متاحة
كود [IMG] متاحة
كود HTML معطلة
Trackbacks are متاحة
Pingbacks are متاحة
Refbacks are متاحة


المواضيع المتشابهه
الموضوع كاتب الموضوع المنتدى مشاركات آخر مشاركة
تفسيـر الاحـلام حسب الحـروف ....... ملــف كامــل .. عديل الروووووح منتدي علم النفس و منتدى حل المشاكل الاجتماعية 51 04-26-2017 12:59 PM
رواية(اما غرام يشرح الصدر طاريه ولا صدود وعمرنا ما عشقنا ) بقلم /صدووود s11o قسم الروايات المكتملة 110 03-27-2017 04:08 PM
ولاية المراة (بمناسبة اليوم الدولى للمراة) اشرف لطفى المنتدي الاسلامي (الشريعة و الحياة) 7 03-11-2012 10:33 AM
من أساليب التربية النبوية رحمة تونسية منتدي السيرة النبوية والسنة المطهرة 7 11-23-2011 06:22 PM
علوم الفراسة sahorti منتدي علم النفس و منتدى حل المشاكل الاجتماعية 8 05-06-2011 09:09 PM


الساعة الآن 09:50 PM.


Powered by vBulletin® Copyright ©2000 - 2017, Jelsoft Enterprises Ltd.
المقالات أو المشاركات أو الآراء المنشورة في شبكة منتديات برق بأسماء أصحابها أو بأسماء مستعارة لا تمثل بالضرورة الرأي الرسمي لشبكة برق بل تمثل وجهة نظر كاتبها.