**~~ CC Cream - BB Cream ريفيو حصري جدا علي برق من Roraa **~~

[Roraa]

قمرات برق ازيكم جميعا ان شاء الله تكونوا بخير.

.

الموضوع مش للاستعراض
الموضوع للافادة الحصرية عندنا فقط في برق .

محتوي الموضوع انا بريئة من استعماله او الاستفادة بيه لغير المحارم و الزوج.
رجاءا الزينة والميك اب في البيت بس.

اولا: BB Cream

اولا ناس كتيرة قوي بتسمع عن الBB كريم و الحرفين دول اختصارا لكلمة (Blemish Balm) او كريم خافي للعيوب
الكريم ده مشهور قوي في دول اسيا كلها تقريبا بيسموه احيانا (Nude Make Up ) او (No Make Up Cream)
البنات الاسيويات بيحطوه علي بشرتهم في دقايق معدودة ده بيتفرد وفرشتين بلاشر وتبقي بس خلاص خلصت الميك اب.

من مميزاته الكبيرة قوي
انه بعض الماركات الخاصة بمنتجات العناية بالبشرة والجسم بتنتجه و بيكون فيه مركبات و زيوت و معالجات او سيرمز مهمة جدا للبشرة
يعني مش بس بتحطي كريم اساس لا كمان بتستعملي كريم بيعالج عيوب بشرتك الي جانب ان مميزات النوع ده من الكريمات انه بيكون فيها واقي من اشعة الشمس (خدوا بالكم درجاته مش عالية قوي اعلي حاجة 72 ) وكمان كريم ترطيب واحيانا معالجة للتجاعيد.
ولكن مش كل الماركات بتتكلم عن افاداته للبشرة قدر تغطيته للعيوب
و بعض الماركات بتكتفي بانه يستعمل ككريم اساس وفقط من غير معالجات مهمة للبشرة
عادة الماركات العالمية هي اللي بتهتم بتغطيته للبشرة الجيدة وبس من غير معالجة.

المقدمة ديه عندي طويلة قوي و زهقتني يالا بينا علي الصور.
و انا هحاول باختصار اقول مميزات وعيوب كل نوع.

(المودل اللي مشتركة معاي ووافقت نعرض علي ايديها هي بنوتي الكبيرة ذات الخمس سنوات استاذنتها نعرض صورة ايديها فهي استغلت الفرصة وطلبت اظبط لها ايديها واحط لها مانكيير عشان تشوف صورة ايديها حلوة فمعلش استحملوها بقي واستحملوا شروطها)

دول كل ال BB كريم اللي عندي ومعظمهم او كلهم من ماركات صينية مشهورة لاني بستعمله في البيت بدلا من كريم الترطيب احيانا لان الميك اب عندي روتين يومي (في البيت طبعا لزوجي حياتي وبس) فبهتم اجيب الماركات اللي تغذي بشرتي ومش تاذيها
فلقيت ده في الماركات الصينية اكتر من ماركات تانية كتيرة مشهورة عالميا اكتر من كده.
(هنشرح من اليمين للشمال)
ست انواع مختلفة ومن ماركات مختلفة

من اليمين للشمال

الاول من ماركة Golde Silk Face
بيتميز انه فيه معامل حماية من الشمس مرتفع شوية وكمان بروتينات الحرير وبودرة اللولو ومعادن اساسية للبشرة
المفروض انه كمان بيغطي اي تجاعيد او خطوط دقيقة و كمان بيعالج ظهور التجاعيد قبل اوانها (بس انا ما حسيتش بكده خالص بصراحة كلام اعلانات)
تغطيته ممتازة ومش بيشقق والا بيعرق
ادي له 10/10

الثاني من ماركة Beely
تغطيته هايلة ولكن فاتح شوية ومش مناسب قوي في فصل الصيف بحسه بيسيح قوي
ولكن الفيتامينات ومعالجات البشرة اللي فيه مش كويسة قوي.
اعتبره عادي
8/10

الثالث من ماركةYang Sang
وده اكتر الكريمات انتشارا دلوقت في الصين كلها واخد افضل BB كريم في الصين لسنة 2011
ميزته انه مناسب لكل انواع البشرة حتي الدهنية والمختلطة و ميزته الكبيرة كمان ان فيه بودرة اللولو فبيدي ضي ممتاز قوي مع الاضاءة كده واكيد مع التصوير.
معالجات البشرة اللي فيه مش قوي قوي يعني ولكن بودرة اللولو بيقال انها بتعمل معالجة للبقع الداكنة بس انا مش بعاني منها خالص الحمد لله فمش عارفة تاثيره.
ولكن مع الوقت مش بيشقق والا بيتغير لونه والا بيعرق وفي الصيف بحسه مط كده ومشدود.
ادي له 10/10

الاول من اليمين من ماركة Natural&Care
هو لونه مش زي لون كريم الاساس الطبيعي يعني مش بدرجات لون البشرة ولكن لونه اخضر فاتح ممكن يستعمل لوحده او ممكن يستعمل تحت ال BB كريم اللي مفيهاش معالجات للبشرة
لانه من مواد طبيعية 100 % بيمنع اشعة الشمس وكمان مرطب قوي مناسب لفصل الشتاء اللي تقريبا كل انواع البشرة بتكون جافة و مشدودة فيه.
ولونه الاخضر بيوحد لون البشرة جدا حتي لو مش هتستعمليه لوحده او قبل اي نوع كريم تاني.
واحيانا بستعمله مباشرة وفوقيه بودر بس بحس انه فاتح قوووووووووووووووووي.
معامل الوقاية من الشمس فيه ممتاز ومرتفع نسبيا.
ادي له 10/10

الثاني من ماركة Hi-Face
وديه ماركة كوري مش صيني خالص
فيه منه انواع مناسبة لكل انواع البشرة
الخوخ والبرتقال والتفاح
التفاح اللي هو عندي ده مناسب لبشرتي اللي هي مختلطة
خفيف جدا وتغطيته كويسة ومناسب لفصل الصيف لاني جربته كتير و مش بيلمع والا بيعرق والا حاجة.
معالجات البشرة فيه مش كويسة قوي وكذلك معامل الوقاية من الشمس.
ادي له 10/9

الثالث ده
معالجات البشرة فيه ممتازة ممتازة ومضادات التجاعيد والحبوب
فعلا بحطه وبمسحه مش بحس اني كنت حاجة علي بشرتي خالص
الانواع التانية احيانا بحس ان بشرتي بهتت شوية بعد ما بشيلهم
انما ده غيرهم تماما بجد ممتاز
بخلاصة زيت الورد وزيت اللوز الحلو والجوجوبا وشجرة الشاي
تغطيته ممتازة و لكن معامل الحماية من الشمس فيه مش مرتفع قوي (عامة ما بيفرقش معاي لاني بستعمل وبتزين في البيت وبس)

الصورة ديه في علبهم عشان اللي عاوزة تشتريهم توصل لهم بسهولة
ديه لتلاتة فقط لاني لقيت ان التلاتة دول بس اللي كنت شايلة علبهم الباقيين فقدت علباتهم في ظروف غامضة مع اني بحب احافظ علي عبوات الكريمات والمستحضرات لحد ما ارميهم جماعة بس يمكن علبة الميك اب ما اخدتهمش فتخلصت منهم.

وهنا هوريكم الدرجات

طبعا ملاحظين تقارب الدرجات ماعدا الاخضر اللي اتكلمت عنه فوق.
بس تقريبا لما الدرجات بتتفرد بتوصل لنفس النتيجة اللي اتكلمت عنها.

وديه الفرق في الاستعمال
شوفوا ايد البنوتة شخبطت عليها ازاي بقلم الكحل

وشوفوا هنا الشخبطة اتدارت ازاي مع وجود اللمعة الخفيفة

وهنا قبل وبعد (اليمين طبعا بعد والشمال قبل)
انا استعملت اللي هو في اقصي الشمال في اول صورة حتي تلاحظوا لمعة اللولو اللي قلت عليها.

CC Cream

طبعا ديه جديدة شوية علي بعض الناس هي اختصار ل Color Control Cream
بس هي عامة الجيل الجديد من الBB كريم بتتميز انها بنفس خواصه تقريبا ماعدا انها بتزيد عليها مركبات لعزل البشرة من الضوء والحرارة و الاشعة المنزلية زي الكمبيوتر والتلفزيون وما الي ذلك.
وبيكون عليه زيادة فيتامين سي عشان يساعد علي منع اكسدة البشرة و منع تكون البقع الداكنة ومعاجلتها كمان بمعني اصح بيفتح البشرة بشكل ملحوظ وبيمنع وصول الاشعة الضارة من اي نوع للبشرة.
وبيدي منظر مط ممتاز جدا عن معظم انواع الBB كريم المنتشرة.
فيه منه انواع كتيرة مقاوم للتجاعيد ومقاوم للحبوب وما الي ذلك
بس عمليا كله زي بعضه.

وديه صورة افضل الانواع اللي انا استعملتها ( وهما تقريبا افضل نوعين منتشرين دلوقت في السوق الصيني والتوب حاليا في الريفيوهات كلها)

الاول علي اليمين ده حاجة تانية بس حبيت اصورها لكم عشان ادي لكم فكرة عنها لان ممكن البعض محتاج معلومات عنها
احيانا الكريمات من الانواع BB او CC كريم مش بتغطي قوي المسام الواسعة وبعد تلات ساعات من وضع الكريم كده بيبدا يشقق في اماكن المسام الواسعة خاصة للبشرة المختلطة زي حالاتي.
فده زي رغوة بتوضع تحت الكريمات ديه بتتحط علي البشرة لحد الجلد يشربها خالص من غير ما تفركيه والا تدعكيه وبعد ذلك ادهني كريمات او البيس براحتك بتخليه قدر الامكان يعيش اطول فترة زمنية ممكنة
وديه صورته علي ايد البنوتة

و ديه صورة درجات الCC كريم اللي في الوسط والي علي الشمال.
اللي عبوتها لونها وردي هو اللي لونه وردي
واللي عبوته لونه نبيتي ده اللي لونه زي كريم الاساس.
بس الاتنين عند الفرد نفس النتيجة مفيش فرق ماعدا ان الوردي افضل بكتير لانه بيساعد علي تنقية البشرة وتوحيد لونها من الاستعمال فلذلك ادي للوردي 10/ 10 وللتاني 9/10.

اخر حاجة مهمة جدا اقولها

ان النوع ده من كريمات البشرة مش بيتشال باي شكل من الاشكال والا بالميه تقريبا ولازم كل تلات ساعات بالكتير يتجدد تاني خاصة لو هتطلعي بيه بره البيت (بس انا خالية الذمة من انك تستعملي اي حاجة من اللي قلت عليها وتطلعي بره بيتك)
فلذلك لازم له مزيل مناسب عادة بيكون زيتي او مناديل خاصة مبللة بالزيت مش الكريم او الماء.
وده افضل الانواع في السوق الصيني دلوقت مصنوع من مركبات الشاي الابيض وبينضف المسام بعمق كمان عشان يمنع انسدادها واكسدة الغبار والتراب فيها.

السوال الاكيد طبعا في اذهانكم دلوقت نجيب النوع ده من الكريمات منين
حاليا كل الماركات العالمية عملت النوع ده من الكريمات وابتدي ينتشر في الاسواق
يعني غارنييه ونيفيا وماك ومايبلين و انواع كتيرة ابتدت تنتجه

ان شاء الله اكون قدرت افيدكم ولو بحاجة بسيطة.

في حفظ الله ورعايته

[خَفَآيَآ الْرُوْحْ]

تسلمي رورا على المجهود الرائع
موضوع مميز بمعنى الكلمة
ربي لا يحرمني الطلة الحلوة وترجعي بسلامة ^ ^
احلى تقييم لعيونك ي قمرايةة
كل الود والتقدير

[ريم جادالله]

اهاااااااا مجهود ولا اروع

معلومات وارشادات وكمان نصائح !

مشكورة اختي رورا على الموضوع التحفة ده

الله يعطيكي العافية

دنتي على طول الخط حصري , حصري . خف علينا

شويا يا بت .......... لوووووووووول

دمتي متميزة وان شاء الله نشوفك على طول بالمنتدى

وترجعي لينا بالسلامة باعلى العلامات ...اوك

في حفظ الله ورعايته

[ليليان القمر]

يسلمو يا قلبي

على موضوعك التحفة

وعلى المعلومات الرائعة

[Roraa]

اقتباس:
المشاركة الأصلية كتبت بواسطة خَفَآيَآ الْرُوْحْ
تسلمي رورا على المجهود الرائع
موضوع مميز بمعنى الكلمة
ربي لا يحرمني الطلة الحلوة وترجعي بسلامة ^ ^
احلى تقييم لعيونك ي قمرايةة
كل الود والتقدير





الله يسلمك ياقمر
وميرسي على المرور الجميل
في حفظ الله ورعايته