اذا مخطوبه او لسه تعالي ادخلي وافهمي

[Roraa]

السلام عليكم ورحمة الله وبركاته

حبيت كل واحدة مخطوبة او مش مخطوبه تدخل تشوف كلامى ده قبل متقرر تكمل مع خطيبها او لاء مع انى مبحبش موضوع الانفصال ده بس ساعات بيبقا ضرورى لما بنحكم عقلنا

انا مقتنعة جدا بفكرة ان فترة الخطوبة مش كل واحد بيبن اجمل ما عنده وبس لكن حتى لو بيعمل كده ف غصب عنه الطبع غلاب والخطوبة برضه بتبين عيوب زى مميزات بدليل اللى بتدخل تشتكى من خطيبها ف ياريت بلاش كلمة انا اكتشفت انه طلع واحد تانى بعد الجواز

وهديكوا امثلة

واحده بتلاقى خطيبها بتاع بنات واكتشفت انه بيكلم بنات غيرها وبعدين يرجع يعيطلها ويقولها دى كانت نزوة واوعدك مش هيحصل تانى
هقولها الطبع غلااب ومحدش بيتغير عشان حد وبعد الجواز هتلاقيه بيعرف بنات غيرك برضه ومن وراكى ولو عرفتى مره هيصالحك والتانيه يصالحك والتالته يقولك انا كده وان كان عاجبك

اللى تلاقى خطيبها مبيصليش وتقول هحاول معاه وهغيره لا يا حبيبتى دى هداية من عند ربنا وقت ما ربنا يحب يهديه وهوه يكون فى دماغه انه يلتزم فى الصلاة هيلتزم مش عشان انتى عايزاه يصلى لان الراجل بيحب يكون السيد فى العلاقة يعنى ميحبش خطيبته ولا مراته تقوله صلى هيعند لازم من جواه يكون عايز يصلى

اللى خطيبها بيشتمها وممكن يمد ايدها عليها هيجى بعد الجواز يعمل اكتر من كده وانتى حرة بقا مترجعيش تشتكى

اللى مبيحترمش اهلها وعلى فكرة فى بنات بتخلى خطيبها غصب عنها انه ميحترمش اهلها زى مثلا اللى مبتسمعش كلام اهلها او بتعمل معاه تجاوزات بينه وبين نفسه هيقول هيه مبتحترمش لا ربها ولا أهلها انا هحترمهم ليه وممكن يكون هوه نفسه غلاط من غير متعمل حاجة اصلا

خطيبها بيروح يحكى كل حاجة لمامته ده حصل كذا وعملنا كذا ولو حصل مشكلة بين الاتنين تلاقى مامته تكلمها تقولها انتى مزعلاه ليه متقوليش هيتغير لا عمره مهيتغير هيفضل طول عمره ابن امه

اللى تلاقى خطيبها بيقبل عادى انها تكلم اى ولد غيره وميغيرش عليها يبقا معندوش نخوة وهيفضل طول عمره كده مهما حاولتى



انا مقصدش من موضوعى ده أى حاجه غير انى اقول للبنت قبل متتجوزى وتاخدى الخطوة الكبيرة دى انك تفكرى كويس فى الشخص اللى معاكى الموضوع مش فستان وطرحة ورومنسية وحنية وبس الموضوع كبير اوى بيت مسئولة عنه اولاد لازم يتربوا صح ومينفعش يتربوا صح غير لما يكون الاب والام اسوياء
ميجيش الولاد يشوف ابوهم بيهين امهم او مبيصليش او بيضربها او بيعرف ستات غير مامتها او ملوش شخصية ادام امه او معندوش نخوة اكيد مش هيطلعوا اسوياء

وعلى فكرة مش شطارة انك تقولى هغيره لانه محدش بيتغير غير لما يكون عايز يتغير من جواه حتى لو بيموت فيكى زى فيلم العشق والهوا لما مجدى كامل كان بيموت فى منى ذكى ومع ذلك متغيرش عارفين ليه لانه من جواه مش عايز يتغير ومستسلم لحياته كده وهوه اتعود على كده والطبع غلاب

واحب اكرر تانى انا مقصدش من الموضوع ده غير انى انبه اى واحده لانها تفكر كويس وتصلى استخارة وربنا يصلح حال كل البنات
انا عارفه ان موضوعى ده مش هيعجب بنات كتير بس انا مش قصدي غير مصلحتكم وبس

في حفظ الله ورعايته

[* بسمة أمل *]

المهم حبيبتي تكون ايجابياته اكثر من سلبياته لانه مفيش حد كامل
والكمال لله
تسلمي حياتي عالموضوع الرائع
والنصائح المفيدة اللي اكيد حتستفيد منها كل البنات
وان شاء الله يرزقنا بالازواج الصالحين
تحياتي لك

[Roraa]

دا اكيد
مفيش حد مش فيه عيوب
بس المهم اذا كانت العيوب دي محتمله او لأ
لازم نقعد مع نفسنا ونشوف اذا كنا هنستحمل دا ولا لآ

وميرسي على المرور الجميل ياقمر
في حفظ الله ورعايته

[برق سوريا]

<<< داخل يفهم


شكرا لإلك وعلى نصائحك

وان شاء الله البنات تستفيد

بس انا متأكد انو البنات رح تنسى نصائحك بس يعرفوا انو اجاهم عريس هههههههههههه

[صوفيا سيف]

الله يعطيك العافية خيتوووووووووو
عن النصائح نتمنى يكون الخير والصدق في اي مكان
تسلمي واعيد الشكر على الفائدة